暗示與TVB完約變自由身? 網民齊撐離開大台 孫慧雪：計劃完約後做喜歡的事

孫慧雪（阿雪）噚日（30日）喺社交平台分享近照，白色Deep V吊帶裙造型配合俐落鎖骨短髮，同平日傻氣形象有所分別；佢亦有感而發表示：「不停思考著未來的方向，真正想做的有很多，時間和力量卻不多，我告訴自己，盡了力就好！」唔少網民留言為佢打氣：「人是很渺少的，凡事能用心盡力去做，問心無愧便巳很感恩。」、「能做自己已經係一種成就」、「量力而為」等等。

除咗幫孫慧雪加油，網民仲建議佢快啲離開無綫：「唔想妳在係CCTBV快點離開，唔好再嘥時間在呢間公司」、「cctvb不了」、「離開大台就是你的出路」等等。而孫慧雪亦大方回應：「未完約呀！」，及後又留言話：「計劃完約後做喜歡的事。」言下之意，似乎暗示同無綫完約之後就會回復自由身。

孫慧雪2006年入行由無名死屍做起，直至《美女廚房》助手「飯」嘅機會而知名度稍稍上升，但之後多數都係飾演閒角、傻大姐角色，好多網民仲為佢紅唔起而感到不值。今次孫慧雪喺社交平台嘅帖文，網民亦表示關心，問及係咪完約即走，仲有幾耐完約，仲叫佢過檔ViuTV或者再生BB等等，不過孫慧雪暫時就未有再答覆。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載