守戒幾乎要出家 蕭正楠開騷愁超時 靠翠如魔音清場

蕭正楠開騷在即,在倒數活動獻唱當綵排。
蕭正楠開騷在即,在倒數活動獻唱當綵排。

即將開騷的藝人蕭正楠前晚出席倒數活動,表示徇眾要求邀得太太黃翠如任音樂會嘉賓,為免超時罰款,悉心安排她在安歌環節出場,主力負責清場,會唱到觀眾捨得離場為止,認真抵死!

蕭正楠、胡定欣、呂方、謝東閔及谷婭溦等,前晚出席大嶼山寶蓮寺舉行的節目《福佑香江 同心邁向2023》,陳展鵬夫婦及袁偉豪夫婦亦有出席支持,齊齊倒數迎接新一年!

首次到訪天壇大佛的阿蕭,被問到為何不攜眷出席?定欣聞言即笑指阿蕭「守齋戒」,阿蕭表示:「我咁純仲要洗滌?要出家喇喎!」他笑言雖然天寒地凍,但太太黃翠如趕及於2022年結束前,為他做了首件窩心事:「呢件褸嘅鈕本身係第2隻色,翠如幫我換晒所有鈕,真係好感動,唔甩㗎!(2022年最後一日先做好事?)係呀,我嚟緊開騷,所以唔可以咁快用完,佢係好太太!」提到即將開騷,是否邀請太太任表演嘉賓?他直言翠如正在家中努力練歌:「佢好似唱《天黑黑》,到時合唱同獨唱都得,總之Encore位唱!伊館超時好貴,佢可以送走觀眾,好快清場,表演送客,啲觀眾未走晒,佢再唱多首!」

陳貝兒節目旺丁

至於呂方談及愛女時一副慈父樣,自言享受湊女兒返學放學的日子,又指近2年因疫情關係未能出外工作,多了時間陪家人,實屬難得:「日日對住個女,我好開心,希望疫情過後,個女又大啲,我就可以順利出去工作。(會唔會為個女出兒歌?)我唔夠佢唱,佢聽音樂會郁,係有天分,不過聽我啲歌冇反應,一聽Bruno Mars特別起勁。」

而擔任司儀的陳貝兒,預告年中將開拍新一輯《無窮之路》,問到去年是否賺到笑?她避談:「賺到經驗同好多飛行里數,希望新一年繼續有好多唔同嘅工作機會。」又指另一個主持的節目《嫁到這世界邊端》系列亦有望再添食:「之前拍咗3輯,同啲人妻到依家都有保持聯絡,個節目好旺佢哋,拍完之後個個都添丁。(有冇旺到你啲姻緣?)我覺得自己OK,事業OK,慢慢嚟啦!」

各人興奮倒數迎接新一年。
各人興奮倒數迎接新一年。