家族榮耀︳做闊太太得閒 熊黛林復出演技大爆發 網民： 睇到眼火爆

TVB劇《家族榮耀》當中，飾演大少奶嘅熊黛林（Lynn）十分搶鏡，咀藐藐反白眼睇到觀眾眼火爆，早幾集家逢巨變而崩潰喪喊亦交足功課。唔少人對Lynn印象仲停留喺郭富城，又話估唔到咁好戲。

唔覺唔覺，熊黛林「逃城」9年，演技升呢之餘，仲嫁埋俾身家上億嘅郭可頌，又生咗一對孖女，各有各幸福人生，咪幾好。

2006年熊黛林參演郭富城MV做女主角，因此撻著。拍拖7年，多次傳出Lynn「攻城」結婚傳聞，不過一直冇下文，最終分手收場。但係熊黛林起碼因為呢段戀聞而人氣大升，仲參演電影《葉問》飾演葉師傅太太張永成。

同城城分開一年幾之後，熊黛林因為好友郭可思認識其弟郭可頌。郭可思係郭可頌三家姐，而大家姐就係TVB90年代花旦郭可盈。熊黛林憶述對郭可頌印象好好，認為男方有禮貌又顧家，於是主動出擊約對方飲嘢，但係竟然被請食檸檬，再約食飯郭可頌都唔敢覆。後來熊黛林直情叫朋友轉告心意，向郭可頌大派定心丸暗示有意，先至開始約會。

熊黛林同郭可頌交往初期，曾被傳媒質疑係介入男方家庭，郭可頌主動交代話同結婚2年嘅前妻因性格不合而分開，正式離婚後先認識熊黛林。坦白交代兼護花﹐相比城城7年來嘅處理手法，即刻加晒分。

拍拖2年後熊黛林同郭可頌宣布結婚，2018年誕下孖女後熊黛林更淡出幕前。郭可頌打理家族塑膠廠生意，Lynn過住富貴生活全職湊女，但係受訪時話做full time mom日日都係照顧住2個女，有啲迷失自我，所以決定復出，認為拍戲輕鬆過湊女，老公仲應承幫手照顧2個女。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！