容祖兒財源滾滾 牛年繼續威

東方日報
·4 分鐘文章
祖兒祝大家心想事成,最緊要身體健康。
祖兒祝大家心想事成,最緊要身體健康。

踏入牛年大年初一,天后容祖兒跟大家拜年!出名「牛咁勤力」的她為綜藝節目《乘風破浪的姐姐2》繼續留守內地,為掘金更不惜練舞練到膝頭腫痛!她決定趁農曆新年休息,「充電」後再為工作搏殺。思「香」病發的她自爆這段時間,全靠睇姪女的片段撐住!

北上工作的容祖兒現時不在香港,身為孝順女的她惟有隔空與媽媽「視像拜年」,坦言掛住媽媽炮製的甜齋,以及好姊妹蔡卓妍炮製的蘿蔔糕。雖然家人不在身邊,但就有情同姊妹的經理人霍汶希(Mani)陪過年及情人節,她說:「呢7個月如果冇佢(Mani)我都幾狼狽,佢住我樓下,我會落佢度一齊過年初一、初二、初三直到永遠,哈哈!全靠佢幫我充撐新年氣氛。」又笑言會找同樣在內地的好友謝霆鋒、陳偉霆過年:「有Mani喺度,點會集唔齊我哋!我哋初一會團拜,同老闆(楊受成)網上拜年,已經叫咗佢到時唔好撳住荷包。」

跳舞傷膝 收爐抖抖

農曆新年不用拍節目,祖兒坦言終於可以好好休息及「療傷」:「之前一口氣錄咗好多集,因為要跳舞、訓練,全部肌肉都好疲累,膝頭又腫,希望趁呢段時間畀把聲、肌肉同膝頭休息。」每逢佳節倍思親,更何況已離家大半年,她坦言很掛念香港:「掛住屋企人、隻狗、細佬個女、香港嘢食,但一定要拍完節目先可以返嚟。」母性大發的她冧笑說:「有時就係睇我細佬個女啲片嚟慰藉心靈,自己睇到喺度笑,見到佢啱啱識行路一仆一碌、出大牙發燒個樣懵盛盛都幾搞笑。佢開始去到好好玩嘅階段,真係好得意,睇到都好開心!」問到有何新年願望?她祝願大家:「最緊要身體健康、心想事成、財源滾滾、開開心心!」

提到她在《浪姐2》的表現愈來愈亮眼,在首次出爐的排行榜及個人喜愛度排名,分別排第2位及第3位,她多謝現場觀眾:「作為廣東歌手,嚟到湖南大家對我唔太熟悉,但估唔到現場反應咁好,畀好成績我,令我充滿信心,呢20年努力冇白費,會唱多啲粵語歌同大家分享,希望戰到最後,組團成功!」歌精舞勁的祖兒,還有甚麼可以難倒她?她謙稱:「真係講笑,大家覺得我好擅長,但其實唔係o架!我要用好長時間pick up每隻舞,演唱會有2、3個月畀我哋綵排,但呢度最多係8、9日就要上台演出,要訓練自己學習速度快啲。」

打開心扉 相處融洽

祖兒還表示要學習與其他參賽者相處:「我個人比較慢熱,唔會一下子好多話題,但因為好多時我喺節目擔任隊長,所以要調整自己嘅慢熱,同自己講要打開個人畀人哋認識,進入我嘅世界。」提到眾「姐姐」一齊住女生宿舍,問到可擔心相處有拗撬?被鏡頭經常影住又可會神經緊張?她笑言:「開始時有啲緊張,覺得慘喇要素顏、敷住面膜咁見人,但諗諗吓又冇咩所謂,都係每個女仔做嘅嘢。我細個冇試過寄宿,亦冇試過同班女仔一齊住,感覺好新鮮,大家嘻嘻哈哈分享嗰日做完嘢嘅感覺,然後就一齊瞓着,因為好攰。同埋我啲同房成日會分享面膜、美容機,畀佢哋熱情融化咗。」眾「姐姐」中,她坦言最喜歡那英:「佢真係好得意、好真性情,而且好照顧我哋呢啲後輩,又冇架子,成日同我哋講笑,有佢喺度氣氛好好。」

踏入牛年,祖兒承諾畀心機工作,帶更多娛樂給大家。
踏入牛年,祖兒承諾畀心機工作,帶更多娛樂給大家。
北上掘金的祖兒,感激經理人霍汶希為她打點一切。
北上掘金的祖兒,感激經理人霍汶希為她打點一切。