雅虎香港新聞專做飲食 大坑係藝人創業聖地?
藝人好多時都會搞多瓣生意，皆因知名度夠做宣傳夠晒方便。港島大坑除咗舞火龍出名，亦係唔少藝人副業嘅發跡地，咁啱得咁蹺，個個都係做飲食生意。
【立即按此】進入「Yahoo坑火相傳．大坑之味」推廣活動專頁
麥包 － 食材店
最新加入戰團嘅係向來都有做吓生意嘅麥包（麥長青），今年7月喺大坑開設主打日本和牛食材專門店，無懼疫市挑戰。本來想低調開業嘅麥包﹐得到好友湯寶如喺facebook出post力撐，點知湯記無端端喺留言同網友爆發罵戰，唔覺意曲線收到宣傳之效。
谷祖琳 － 甜品店
早喺2008年，谷祖琳進駐大坑開設甜品店，更得到古天樂、郭富城等星級友好幫襯，當堂客似雲來。食住個勢，小谷嘅甜品店一度有多間分店，不過喺前年開始各間分店逐漸結業，現時只剩低喺太古城美食廣場嘅檔攤。小谷話因為業主收返分店舖位、租金水平以至舖面空間等問題，於是逐一收檔，正係搵緊地方配合重整後嘅新飲食業務。
林子善 － 茶餐廳
林子善2012年喺大坑開設第一間「茶記」，受訪時佢話半年已經回本，最高峰期有5間分店！聽落好似好好搵，但係林子善事事親力親為，每個禮拜都落舖巡場，甚至通渠都自己搞掂。去年12月，子善突然宣佈退股唔再打理茶餐廳生意，佢話因為要照顧太太同囡囡，同埋做返全職演員喎。
楊秀惠 － 日式刨冰
谷祖琳以外，楊秀惠2016年都喺大坑同朋友夾份開過甜品店，主力賣刨冰同日式蛋糕。但係比起前面2位，秀惠間甜品生意未大展拳腳就已經低調結業嘞。
李思欣、吳國敬 － 西餐廳
同楊秀惠份屬好友嘅李思欣，差唔多喺楊秀惠開甜品店嗰排，搵埋吳國敬、麥包等朋友夾份開西餐廳，拿手菜有扒類同埋燒烤，唔少圈中人都幫襯過。李思欣話生意唔錯，預計一年回本，不過大坑飲食業競爭太劇烈，間餐廳最後都係做唔住。
【立即按此】進入「Yahoo坑火相傳．大坑之味」推廣活動專頁
相關報導：