【專家分析】道指爆頂後有力再上

【Now財經台】美國經濟三大復甦指標表現強勁,上周新領失業救濟人數1年最少,3月零售銷售增長係10個月以嚟最勁,銀行股業績亦十分亮麗,刺激道指噚晚歷史性升穿34000點,同標指齊齊破頂,納指亦有得升。不過,美國10年債息跌穿1.6厘水平,跌到1個月低位。

華盛証券證券分析師聶振邦指,債息升跌係要其他因素配合,之前由於冇咩消息,市場先會將焦點放喺債息身上。佢又話,債息同債券價格存在反向關係,需求少債息就會升,由於投資者逐步分散投資,令債券需求大咗,所以債息就回落。聶Sir又話,經濟數據靚同美國總統拜登嘅經濟刺激方案有關,一定利好整體大市氣氛,又估計美股升勢可以持續一段時間。