【小鬼黃鴻升逝世】 同楊丞琳分手後保持友好 講錯嘢與羅志祥反目

台灣藝人黃鴻升（小鬼）今日驚傳喺家中逝世，終年36歲。小鬼經理人證實噩耗，稍後會發表死因。

入行近20年嘅小鬼，2001年就讀高中生嘅時候參加電影《藍色大門》選角訓練班，導演最後揀咗陳柏霖做男主角，小鬼亦無份參演，但就被經理人睇中，18歲正式出道。

黃鴻升喺初出道演出嘅偶像劇中，角色叫做小鬼，於是以呢個稱呼做藝名。起初小鬼做過兒童節目主持，又同陳柏霖等人組過男團，但直到2006年擔任《娛樂百分百》主持先廣為觀眾認識。

人氣漸升嘅小鬼之後得到拍劇嘅機會，演出過《東方茱麗葉》、《轉角遇到愛》及《醉後決定愛上你》等，另外又推出過多張唱片。演藝事業之外，亦有開設潮流服飾店。

小鬼就讀華岡藝校時曾經同楊丞琳(Rainie)拍拖，後來Rainie休學出道，雙方決定分手，但仍然保持友好關係。Rainie甚至公開承認小鬼對自己非常重要，Rainie開演唱會或者小鬼開畫展，佢地都會現身為對方撐場。

楊丞琳以外，小鬼好友還有歐漢聲、修杰楷、坤達等。佢一度同《娛樂百分百》頭號主持羅志祥（小豬）係亦師亦友嘅關係。不過有傳小鬼同朋友對話時批評小豬fans冇氣質、膚淺，說話傳到小豬耳中令佢相當不快，小豬甚至喺主持節目時質問小鬼「你說喜歡我的女生都怎樣？」。之後兩個人如同陌路，小鬼亦自動退出《娛樂百分百》主持行列。早前小豬被前女友周揚青大爆「多人運動」等偷食指控，小鬼回應記者時就話自己冇對方電話號碼。

近月受疫情影響，小鬼承認潮店生意唔好，而自己主持節目剩返2個，包括令佢人氣急升嘅《綜藝玩很大》。感情方面，早前有傳小鬼同台灣職棒啦啦隊峮峮過從甚密，被拍到多次在女方香閨過夜。