尖咀新開5000呎日式精品超市 創意咖啡+健康沙律+手工飯糰+生活雜貨

·4 分鐘文章

尖沙咀又有新店出現排隊人龍,不過今次唔係過江龍或者Cafe,而係新開嘅日式精品超市谷辰 !佔地超過5,000平方呎,加上裝修以日式自然風貌為靈感特別加分。而對喺附近返工嘅朋友嚟講,更加唔可以錯過裡面嘅兩大輕食專區,一個以咖啡同沙律為主,另一個主打日式手工飯糰,Grab & Go都可以食得有營又好味。

創意咖啡+健康沙律 THE SALFEE BAR

(左)Dirty($40),(右)西柚紫蘇有氣咖啡($54)
(左)Dirty($40),(右)西柚紫蘇有氣咖啡($54)

掃貨前先嚟一杯咖啡提提神,Dirty即係熱Espresso加上凍牛奶,所以記得盡快飲,享受一熱一冷嘅口感撞擊。咖啡係自家House Blend,有Fruity同Nutty兩款風味選擇。西柚紫蘇有氣咖啡就更加特別,用自家冷萃12-15小時嘅紫蘇咖啡,再加上西柚調配而成,果香清爽。

(左)宇治抹茶拿鐵($38/S,$42/L,$42/凍),(右)竹炭伯爵拿鐵($48/L,$42/凍)
(左)宇治抹茶拿鐵($38/S,$42/L,$42/凍),(右)竹炭伯爵拿鐵($48/L,$42/凍)

飲品亦有無咖啡因嘅選擇,抹茶同焙茶飲品都採用嚟自日本嘅高級茶粉,加上人手即場刷茶,令口感特別幼滑無粉粒。宇治抹茶拿鐵有茶香而且回甘明顯,而竹炭伯爵拿鐵就加入黑色嘅竹炭粉,凍飲有類似水墨紋嘅賣相,好啱相機飲先。

沙律($78/2款,$88/3款)
沙律($78/2款,$88/3款)

沙律現時有九款選擇,包括唔同口味例如韓式牛肉椰菜花碎、和風蕎麥麵、越式羽衣甘藍糙米等。最開心係可以隨意配搭兩至三款口味,中間更會以青瓜片隔開,叫多兩個同事一齊Share就可以試晒啦!

日式手工飯糰+便當 米角

(左至右)炙燒和風咖喱牛肉飯糰($32)、北海道昆布伴鰹魚片飯糰($28)、柚子蔥燒鯖魚飯糰($28)
(左至右)炙燒和風咖喱牛肉飯糰($32)、北海道昆布伴鰹魚片飯糰($28)、柚子蔥燒鯖魚飯糰($28)

品牌選用秋田小町米,人手製作唔同口味嘅飯糰,唔單止配料選擇多,連用嘅飯都各有不同!例如拍攝呢三款就分別係秋田小町米燒飯糰、以均衡營養為概念嘅五穀米飯糰,同富含抗氧化劑嘅養生黑米飯糰。包飯糰嘅紫菜係另外獨立包裝以免變腍,而且採用佐賀縣嘅有明海苔,質感比較柔軟、入口即化。

竹筍黑胡麻溏心蛋(期間限定,$32)
竹筍黑胡麻溏心蛋(期間限定,$32)

期間限定口味中間係流心效果超誘人嘅溏心蛋,半熟嘅香濃蛋黃加埋同時具有粘性同嚼勁嘅秋田小町米真係無得輸。而如果覺得Menu上面嘅口味都唔啱心水,仲可以揀自選飯糰,喺秋田小町米、五穀米、養生黑米中揀一款米再加心水配料。

茶漬辛子明太子飯糰($48)
茶漬辛子明太子飯糰($48)

四款指定口味嘅燒飯糰可以配搭昆布抹茶高湯變成茶漬飯!茶湯鮮味非常突出,而且夠熱好啱秋冬食。再伴以Wasabi、野薑、芝麻、日本米通同昆布增加口感同味道層次。

飯糰便當定食($65/一款飯糰,$85/兩款飯糰)
飯糰便當定食($65/一款飯糰,$85/兩款飯糰)

飯糰便當可以揀一款或者兩款飯糰,配搭野菜、料理小品、自家濃湯或靜岡玄米茶,賣相精緻之餘分量其實都唔細,當Lunch食完七至八分飽就啱啱好啦。

減少包裝概念雜糧專區 沢屋

最搶眼嘅一定係呢排一筒筒果仁同雜糧。
最搶眼嘅一定係呢排一筒筒果仁同雜糧。
雖然而家因為疫情關係改用紙袋,但概念係及後大家可以自備容器嚟買需要分量!
雖然而家因為疫情關係改用紙袋,但概念係及後大家可以自備容器嚟買需要分量!

精品超市當中以特別有一區以減少包裝為理念嘅品味生活專區,最搶眼嘅一定係呢排一筒筒果仁同雜糧。雖然而家因為疫情關係改用紙袋,但概念係及後大家可以自備容器嚟買需要分量!

沢屋特選和香悅米禮盒(開業限量,$220)
沢屋特選和香悅米禮盒(開業限量,$220)

慶祝新店開幕,亦特別推出數量有限嘅特選和香悅米禮盒,裡面有三款頂級日本米:埼玉彩之輝米、德島越光米、愛知之香米。加上精美木盒包裝,中秋送禮自用都得,得咗。

亦有嚟自世界各地嘅優質商品。
亦有嚟自世界各地嘅優質商品。

同時亦有嚟自世界各地嘅優質商品,例如本地代表就有上環PLANTATION by teakha嘅精品茶葉、細味公平嘅咖啡等。

精選各地美食+生活雜貨 超市專區

日本直送新鮮水果
日本直送新鮮水果
金箔咖啡
金箔咖啡
罐頭飯
罐頭飯
日本大熱嘅透明醬油
日本大熱嘅透明醬油

佔地5,000呎咁大真係有唔少選擇,從日本直送新鮮水果、蔬菜、急凍食品、酒類等應有盡有。好似最近就有唔少人嚟買金箔咖啡同罐頭飯,唔知係咪假期備糧呢?另外之前日本大熱嘅透明醬油呢度都有呀!

5000呎日式精品超市 谷辰
5000呎日式精品超市 谷辰

谷辰
地址:尖沙咀中間道15號H Zentre地下 01-02 號舖




文、相:Cathy