尖沙咀人氣茶飲店重開 新推芭菲杯+忌廉包+焙茶芝士丸丸

各位茶控唔使再等，尖沙咀呢間人氣茶飲店最近完成搬舖重開啦！將一部分以前大坑店供應嘅輕食帶埋過嚟，再新增芭菲、鮮忌廉包等甜點，連飲品都有新選擇，選擇豐富到好似Cafe咁。焙茶控必試新出嘅焙茶芝士丸丸，想清新啲就推介試伯爵夫人的蘋果呀。

Tea Express Bar By Jrink最近搬到新址，舊店再上一層就搵到。小店主打輕養生概念，所有飲品甜度預設為半糖，選擇由日本抹茶、焙茶、烏龍、紅茶、咖啡，到最近興起嘅發酵茶（Kombucha）等應有盡有。而輕食可以分為沙律、貝果、三文治、吐司。

新增甜品+輕食！

層層疊又材料豐富嘅芭菲賣相非常吸引，呢個焙茶芭菲杯就有達磨造型嘅最中餅、石磨日本焙茶粉、芝士奶蓋、焙茶啫喱、雲呢拿雪糕、朱古力布朗尼，白玉。口感同味道層次都非常豐富，特別係芝士奶蓋帶少少鹹香，可以帶起焙茶嘅甜味。布朗尼有果仁粒，增加香脆口感。

日本近期大熱嘅意大利鮮忌廉包（Maritozzo）呢度都有，用柔軟綿密嘅圓麵包夾住輕盈順滑嘅鮮忌廉。打卡夠搶鏡之餘，食落無想象中咁甜膩。加上士多啤梨嘅酸甜，風味細膩好易一啖接一啖就食完！

想飽肚啲亦有三文治同多士選擇，多士選用本地烘焙嘅無花果核桃酸種麵包配搭新鮮牛油果，酸種麵包帶微微酸味、口感外韌內軟，同牛油果嘅Creamy係絕配。多士同沙律仲會以食用花點綴，色彩繽紛。

輕養生概念茶飲

舊店嘅熱賣No.1抹茶芝士丸丸新增焙茶版本！以即沖靜岡焙茶牛奶配搭芝士奶蓋同白玉。自家芝士奶蓋綿密有牛奶甜味，帶微微芝士鹹香。而焙茶牛奶茶香濃郁，有類似焦糖嘅甜味。白玉口感軟糯。建議打開杯蓋，先分開試奶蓋同焙茶牛奶，再按自己喜好用飲管搞勻享用。滿足得嚟仲幾飽肚下，當甜品咁飲都無問題。

推介畀鍾意花果香、或者想飲少少甜嘢又希望無罪惡感嘅朋友仔。底層係甜味天然嘅日本蘋果果汁同口感爽脆嘅寒天球，中間係伯爵茶、富佛手柑香氣帶紅茶醇厚餘韻，最後以切片蘋果同食用花裝飾。味道豐富、甜度適中。

以韓國流行嘅維也納咖啡為靈感，下層係凍美式咖啡，上面就係輕盈綿密好似棉花糖咁嘅鮮忌廉。推介飲法係好似奶蓋茶咁，唔攪勻就咁飲可以同時品嘗到忌廉嘅奶香，同咖啡嘅香醇。咖啡係本地烘焙、以巴西、印尼、哥倫比亞豆拼配而成，富朱古力香味帶微酸。忌廉表面亦有撒上可可粉，增添層次。

Tea Express Bar By Jrink
地址：尖沙咀河內道18號K11購物藝術館3樓Kiosk 51

文、相：Cathy.H