尖沙咀新開純素Cafe 自家製榴槤蛋糕/牛油果多士/墨西哥卷

尖沙咀新開一間咖啡店，裝修以白色同木為主，感覺舒適自然。供應無蛋奶嘅純素食品，唔少都係自家製作輕食，好似榴槤蛋糕、抹茶窩夫等，醫肚同時仲可以Go Green！

齋啡係手工訂製素食專門店嘅新店，從網店起家，日前灣仔店結業後就搬咗嚟尖沙咀柯士甸道。新店空間較細以吧枱為主，所以主打咖啡、輕食同甜品，方便外賣。

素食會有魚？吞拿魚真身其實係蒟蒻，口感軟滑所以咬落真係幾有食魚肉嘅Feel。配搭Creamy嘅牛油果同煙韌嘅酸種麵包，口感層次豐富。酸種麵包嚟自本地嘅烘焙師，同樣係手工製作。

採用植物豬肉，加上純素芝士、甘筍、羽衣甘藍等蔬菜，配燒烤醬再用菠菜餅皮捲起。整體感覺清爽之餘，味道同口感都相當豐富。

窩夫外微脆內煙韌，口感討喜。選用日本抹茶，茶香唔算非常濃郁，帶淡淡回甘。忌廉係純素大米忌廉，加埋酸甜多汁嘅雜果，食落甜而不膩。

呢度亦有供應自家製純素甜品，當中以呢款白雪雪嘅榴槤蛋糕最受歡迎，蛋糕中間嘅榴槤忌廉用新鮮果肉製作，食落榴槤香味自然。因為無落到雞蛋，蛋糕口感會比一般嘅硬身啲，但都保持到蓬鬆感。

呢款蛋糕口感會再硬啲，邊緣位有少少乾，口感似Scone Cake。兩層焦糖夾心食落無想象中咁甜，配埋忌廉都唔會太膩。

餐廳叫得齋啡就當然會有咖啡供應啦，House Blend糅合巴西同盧旺達兩款咖啡豆，風味偏Nutty。當熱嘅Espresso撞上凍嘅燕麥奶，就飲到帶少少杏仁嘅味道，餘韻甘醇。

亦有Non-coffee Latte、Smoothie等飲品，呢杯Caramel Charcoal Latte同樣用燕麥奶，加上焦糖漿同竹炭粉，味道香甜。

齋啡
地址：尖沙咀柯士甸道154-156號花園大廈地下7B號舖

文：Cathy
相、片：Calvin Kwok