尚羚惡陪月爭湊B 被禁餵母乳

回復心情的尚羚,帶BB曬太陽。
回復心情的尚羚,帶BB曬太陽。

馬來西亞環球小姐冠軍尚羚去年底誕下女兒「豆豆」後,「失蹤」數月,網上及實體社交全面停止。原來她遇上惡陪月,主僕身份掉轉,每日受對方「校長式」教導,產後脆弱的她,身心元氣大傷!

據知尚羚(Sherine)的惡陪月員自恃薑愈老愈辣,犯多宗罪,除了禁Sherine餵人奶而改餵奶粉,又未有因應其身體狀況進補,令她愈補愈虛,更經常大聲教訓及工作期間常用手機等。當Sherine想帶BB入房同睡,陪月又禁止,並說:「你同我爭B湊?」令她大感委屈,但因疫情關係,身在馬來西亞的媽咪未能來港照顧,令她每日要忍氣吞聲,故完全無心機見人。

日前她終於出關,推着BB車現身淺水灣,同行有一名外傭。Sherine買了2杯咖啡給自己及外傭提神,然後抱起女兒豆豆(Elizabeth)隔窗晒太陽睇風景,邊湊B邊歎咖啡,心情輕鬆。BB樣子跟樂隊結他手爸爸馮庭正如餅印,出世時9磅半,現已4個月大,更見「肉騰騰」,Size跑贏同齡BB。Sherine行過BB用品店,幫囡囡揀粉紅色泳衣,還特別選大size,待女兒再大點可以落水玩。

囡囡似老公

對於遇上惡陪月,更被禁餵母乳,Sherine認為是不快經驗:「如果佢唔關心、唔想做,應該唔好做,忽然啟發我想搞個陪月生意,希望幫到其他新手媽媽。(忍咗幾耐?)差唔多1個月,頂唔順,老公叫我辭退佢,好彩後尾畀我搵到個陪月導師,佢教陪月班,因疫情關係未能開班,我喺嗰個月先開始補身。」她說幸BB很會氹人開心,令她重拾笑容,並說:「個個問BB係咪男仔,佢似爸爸,所以我要買多啲粉紅色衫畀佢。(豆豆由細聽你啲歌大?)係,喺肚裏面已經聽,希望第時可以一齊Jam歌。(老公有咩獎勵?)佢話coming,哈哈!」她又表示試用馬來西亞傳統紮肚收身,效果距離佗B前不遠,故心情也有好轉。

外傭姐姐為尚羚母女拍照。
外傭姐姐為尚羚母女拍照。