屢成網民攻擊目標 吳若希駁嘴還拖 蔡嘉欣扮睇唔到

·2 分鐘文章
吳若希(右)與蔡嘉欣屢傳不和,其實超級老友。
吳若希(右)與蔡嘉欣屢傳不和,其實超級老友。

藝人吳若希鼓勵蔡嘉欣早婚生B,快速達標的她再定下一個人生大計,至於待嫁的嘉欣樂於有家庭做大靠山。她們常被網民批評,吳若希愛駁嘴還擊,嘉欣則選擇睇唔到!

吳若希(Jinny)25歲奉子成婚,曾經覺得事業佔去人生大部分,雖然或多或少影響事業,但生完小朋友後達成某些目標,就可以再定下一個目標,對這個轉變感到滿意。

流露一顆恨嫁心的嘉欣直認:「我心態係等緊,Jinny成日叫我哋早啲結婚生仔,27歲都算早結婚咩?但唔係話計劃結婚就會有,都要睇吓遇唔遇到Mr.Right,緣分嚟到我唔介意,結婚對我嚟講係好事,因為你背後有強大家庭支持你。」

最嬲連累家人

提到她們非常「惹火」,不時成為網民攻擊對象,Jinny笑言:「我鍾意駁嘴,當你見到啲人想激你,你激番佢又覺得好好玩,我唔會block咗佢哋,大家各自表態啫。有人鍾意就有人唔鍾意,我都係網民,見到鍾意嘅會留言,不過我同某類型網民唔同,有啲網民唔鍾意你會刻意留言,如果我唔鍾意你就唔會理你。」她笑言甚少為網民的抨擊而動氣:「話我樣衰?好啦,我樣衰,話我唱歌難聽咪難聽囉,呢啲對我個人抨擊係唔會介意。」但若針對其家人,她不會坐視不理:「我唔想見到呢啲事發生,就會block咗佢。」

而嘉欣坦言不會特別反擊:「因為要鬧你嘅人,你點講佢都會鬧,駁火冇意思,當睇唔到算。」加入娛樂圈,她有心理準備被人評頭品足,因為可能自己做得不夠好,但對於一些刻意批判,她覺得毋須澄清:「知我為人嘅依然會相信,唔識我嘅人都唔想去了解件事,既然冇辦法改變佢哋,我唔會嬲。」

蔡嘉欣獻吻,吳若希勁嫌棄!
蔡嘉欣獻吻,吳若希勁嫌棄!



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能