山火襲元朗 張明偉袁文傑狗場救毛孩

尋日八鄉大江埔對上山頭發生山火，逼近附近狗場，過百隻貓狗生命受威脅，負責人緊急疏散撤離並在網上作出緊急呼籲支援，當中處境劇《愛．回家之開心速遞》飾演「George」嘅張明偉、袁文傑、楊證樺就義不容辭凌晨獻身拯救動物，絕對係義氣仔女！

張明偉於社交網發文，指尋晚臨瞓前喺網上見到要人手，佢換件衫就出發，去到現場佢自己有咩就派咩，好似幫手用毛巾冚住啲籠等狗仔唔會驚，又同其他義工齊齊熱心救小生命出生天，徹夜未眠咁進行救援，最後仲呼籲大家以後拜山記得整熄火種先好離開。

而袁文傑及楊證樺亦有現身，二人更被在場義工認出，不過兩人都表現低調。網友就大讚眾藝人咁有心有力做救援，大讚佢哋為咗小動物都咁有心，一定係有情有義呀！

袁文傑接受東網訪問就講述當時救狗經過：「我凌晨2點幾到達，等候義工安排入場，去到時有部分貓已救走，等待狗狗安排入籠再搬走，狗見到人頭湧湧都有啲驚，我負責將狗狗抬去山坡斜路下面，當時入黑同埋路面都比較濕，同埋係斜路，狗狗Size都唔係細，全部都係大狗，所以要好小心，義工朋友再安排送去安全地方，呢個場係我近期有接觸，開始去做多啲身體力行嘅行動，同負責人認識，因緣際會去過探2次，最初發生事好擔心，咁就即刻入去，我逗留到清晨先走。」

狗場義工陳小姐非常感激袁文傑等幫忙，並讚3位演員全無架子，與200多位義工分工合作，三位藝人負責搬籠工作。陳小姐更祝福袁文傑等事業更上一層樓，佢又話狗場依家冇事，狗隻大遷徙後，朝早9點幾火舌熄咗就返回狗場。