【市區行山】何文田後山「採石山」 輕鬆盡覽九龍西美景

·3 分鐘文章
【市區行山】何文田後山「採石山」 輕鬆盡覽九龍西美景
【市區行山】何文田後山「採石山」 輕鬆盡覽九龍西美景

今日市區行山去到何文田,一個印象中都係高尚住宅區地方,其實位於何文田後山,一樣有一個小小山徑,最適合大家有半日時間,登高望遠,望一望九龍西全景,非常簡單易行,就係「採石山」。

背景:曾為舊機場導航

採石山又名紅燈山,因為於舊啟德機場年代時,曾經建有為機場航班指示用嘅大光燈,因此得名。採石山唔算太高,只有107米,而且路線完整,極為易行,就算有小朋友甚至老人家都輕鬆可到。

何文田站出發

採石山位於何文田,非常容易去到,先從何文田港鐵站B2站出發,由於出去就無其他購買地點,要糧水請先從港鐵站內購買。然後上到上面就係忠孝街,先小心過對面行人路,再向左手邊直行,行兩分鐘就會見到眼前有一車閘,並寫上「京士柏食水配水庫」入口,此處就係上山地點。

 忠孝街右手邊就會見到水庫閘口,十分易搵。
忠孝街右手邊就會見到水庫閘口,十分易搵。

欣賞60年歷史水庫

踏入水庫閘口正式進入「紅磡山」範圍,又稱為「十二號山」,沿著斜路一直緩緩向上,漸漸會見到京士栢食水配水庫,原來已經係1960年代興建,欣賞過後就從配水庫旁邊一條小石級向上行,就會進入一個超大運動場,就係京士柏配水庫遊樂場,平日早上仲有唔少街坊上嚟呢度晨運、跑步。

有60年歷史嘅京士栢食水配水庫,歷史悠久。
有60年歷史嘅京士栢食水配水庫,歷史悠久。

觀光台眺望九龍西

於遊樂場最盡頭處會見到一個特大觀景台,就係「忠義街花園」上去之後可以望向港島,可以見到維港海景,亦可以望到何文田。不過此處視野未算最開揚,打過卡後可以離開。

 忠義街花園可以望見遠處維港景色。
忠義街花園可以望見遠處維港景色。

離開球場都有靚景

落返球場,見到有個出口閘門,沿閘門離開,沿路就望到整個九龍西美景,包括何文田、土瓜灣、紅磡、黃埔等,又可以盡情影相留念,之後就可以沿路落山,中途會經過一個涼亭,休息過後可直行就會見到另一個配水庫入口「何文田配水庫」;直行沿路已經唔係石屎地,不過開揚寬闊,兩旁有樹陰好易行。

呢一段路往採石山,已經算最不公整。
呢一段路往採石山,已經算最不公整。

直上採石山

先經過何文田配水庫,會見到綠色鐵欄,山徑入口就會欄杆中,穿過就係一條小路,之後有一條比較窄嘅樓梯往上,必須小心上行,沿路仲可以望到九龍東,觀塘、九龍灣,整個郵輪碼頭都可以望見。上到最頂就係採石山山頂,為一個草地球場,同時係何文田高地水庫。參觀過後沿路折返就可以落返何文田港鐵站。

上採石山山頂一段路,樓梯好窄,需要小心。
上採石山山頂一段路,樓梯好窄,需要小心。
採石山山頂可以望到整個九龍西。
採石山山頂可以望到整個九龍西。
路線
路線

路線:何文田港鐵B2出口>忠孝街>京士栢食水配水庫>京士栢配水庫遊樂場>何文田配水庫>採石山山頂>何文田配水庫>何文田港鐵站

全程:3.2公里

需時:3小時(連休息時間)

難度:初級

來回交通:何文田港鐵站