今日市區行山去到樂富，大家眼中嘅樂富可能比較老舊，而且因為近舊機場，仍遺留大量比較矮小嘅房屋。而今日就係去樂富後山，名為「格仔山」，就曾經係舊機場非常重要嘅地方。格仔山易行又容易去，上落全程不過1個鐘，但山頂景觀開揚，加上背景歷史深厚，可以話「性價比」特高。

背景：曾為舊機場導航

格仔山其實正名為德美山，又稱為樂富山，最高點只有98米。因為近舊機場，當然興建舊機場時更要把部分山勢較高嘅地方剷平，再改為水庫。而機場峻工後，因為近機場跑道，當年山上被塗上一格格顏色，再用作引導航班降落，用以目測作為跑道定位之用，因此被改稱為「格仔山」、「雷達山」。不過自機場搬遷之後，為免誤導航班，格仔已被遮蓋，更隨時間流逝而褪色，格仔不再。

出發準備 樂富商場補給

格仔山於樂富，大家可先到樂富商場進食或購買一切糧水補給。因為格仔山易上易行，好多人唔單單上去行下，仲會特登留低野餐，野餐食品飲品大家都可以於樂富商場入面嘅超市、街市購買，而商場內亦有大量餐飲食店，就算唔野餐都可先填飽肚再去。

路線 樂富公園直入

行格仔山非常容易，樂富商場出去聯合道橫過馬路過對面樂富公園，沿左邊斜路上山，行大概5至10分鐘會到達盡頭有左右分叉路，左邊就係上水庫及花園，右邊就上格仔山。行右邊路上樓梯，行多5至10分鐘比較窄及修得無咁好嘅梯級之後，就會見到4級大石級，再上去就有一條小路。沿路一直行，5分鐘左右就突然「前景一片光明」，因為就係山頂位，見到標高柱（不過已經折斷良久），另外一邊有鐵絲網，另一邊就係景觀開揚嘅全九龍景緻。

景觀 當年機場區域全景

曾經可以為舊機場導航，當然因為夠高。呢度遠望下去，由觀塘至九龍城、九龍塘都一覽無遺，因為曾係機場區域，大部分仍然係低密度及低層樓宇；天氣好嘅時候仲可以望到維港景色。睇完景，要野餐嘅朋友，可以於旁邊配水庫休憩公園一大片草地之上慢慢食慢慢食，非常開揚通風，心情都特別開朗。

回程 原路直接返回

回程好簡單，可以選擇直接原路返去樂富，又或者可以選擇從另一邊落山，就可以落到九龍仔公園，再往九龍塘機鐵站，不過路途比樂富遠少少。總括而言格仔山易行又有景，仲有空間可以野餐。東九龍大家以為只有佐敦谷公園，但其實呢度都係一個唔錯選擇。

【立即讚好】全新 Yahoo 旅遊 Facebook 專頁

Yahoo 旅遊以全新樣貌登場，Facebook 專頁當然同時煥然一新！立即讚好，每日睇盡旅遊新資訊！