【市區行山】樂富後山半個鐘登頂 曾為舊機場導航重要區域

Yahoo 旅遊
【市區行山】樂富後山半個鐘登頂 曾為舊機場導航重要區域
【市區行山】樂富後山半個鐘登頂 曾為舊機場導航重要區域

今日市區行山去到樂富,大家眼中嘅樂富可能比較老舊,而且因為近舊機場,仍遺留大量比較矮小嘅房屋。而今日就係去樂富後山,名為「格仔山」,就曾經係舊機場非常重要嘅地方。格仔山易行又容易去,上落全程不過1個鐘,但山頂景觀開揚,加上背景歷史深厚,可以話「性價比」特高。

背景:曾為舊機場導航

格仔山其實正名為德美山,又稱為樂富山,最高點只有98米。因為近舊機場,當然興建舊機場時更要把部分山勢較高嘅地方剷平,再改為水庫。而機場峻工後,因為近機場跑道,當年山上被塗上一格格顏色,再用作引導航班降落,用以目測作為跑道定位之用,因此被改稱為「格仔山」、「雷達山」。不過自機場搬遷之後,為免誤導航班,格仔已被遮蓋,更隨時間流逝而褪色,格仔不再。

當年係舊機場作為航班導航之用。
當年係舊機場作為航班導航之用。

出發準備 樂富商場補給

格仔山於樂富,大家可先到樂富商場進食或購買一切糧水補給。因為格仔山易上易行,好多人唔單單上去行下,仲會特登留低野餐,野餐食品飲品大家都可以於樂富商場入面嘅超市、街市購買,而商場內亦有大量餐飲食店,就算唔野餐都可先填飽肚再去。

樂富商場補給完,就出發前往樂富公園。
樂富商場補給完,就出發前往樂富公園。

路線 樂富公園直入

行格仔山非常容易,樂富商場出去聯合道橫過馬路過對面樂富公園,沿左邊斜路上山,行大概5至10分鐘會到達盡頭有左右分叉路,左邊就係上水庫及花園,右邊就上格仔山。行右邊路上樓梯,行多5至10分鐘比較窄及修得無咁好嘅梯級之後,就會見到4級大石級,再上去就有一條小路。沿路一直行,5分鐘左右就突然「前景一片光明」,因為就係山頂位,見到標高柱(不過已經折斷良久),另外一邊有鐵絲網,另一邊就係景觀開揚嘅全九龍景緻。

上山小路梯級因為年代久遠而有少許殘缺。
上山小路梯級因為年代久遠而有少許殘缺。
經過呢4級大梯級,就可以到達最高位。
經過呢4級大梯級,就可以到達最高位。
呢度嘅標高柱已級折斷,成為象徵之一。
呢度嘅標高柱已級折斷,成為象徵之一。

景觀 當年機場區域全景

曾經可以為舊機場導航,當然因為夠高。呢度遠望下去,由觀塘至九龍城、九龍塘都一覽無遺,因為曾係機場區域,大部分仍然係低密度及低層樓宇;天氣好嘅時候仲可以望到維港景色。睇完景,要野餐嘅朋友,可以於旁邊配水庫休憩公園一大片草地之上慢慢食慢慢食,非常開揚通風,心情都特別開朗。

山上可望到全九龍景色,由觀塘至九龍塘。
山上可望到全九龍景色,由觀塘至九龍塘。
水庫有一大片空間,可供人野餐休息之用。
水庫有一大片空間,可供人野餐休息之用。

回程 原路直接返回

回程好簡單,可以選擇直接原路返去樂富,又或者可以選擇從另一邊落山,就可以落到九龍仔公園,再往九龍塘機鐵站,不過路途比樂富遠少少。總括而言格仔山易行又有景,仲有空間可以野餐。東九龍大家以為只有佐敦谷公園,但其實呢度都係一個唔錯選擇。


【立即讚好】全新 Yahoo 旅遊 Facebook 專頁

Yahoo 旅遊以全新樣貌登場,Facebook 專頁當然同時煥然一新!立即讚好,每日睇盡旅遊新資訊!

你可能還想看