【市區行山】深水埗都有山行 文青最愛嘉頓山睇日落

Yahoo 旅遊
【市區行山】深水埗都有山行 文青最愛嘉頓山睇日落
【市區行山】深水埗都有山行 文青最愛嘉頓山睇日落

又到每星期市區行山專題,目標係希望大家唔使去太遠,亦無需坐太耐車,於各區市區都有山行行。深水埗可能畀大家印象係電腦中心、宅男天地,但其實位於深水埗都有一個被稱為「文青至愛」嘅行山地點,就係嘉頓山。今日介紹一個半日行程,又輕鬆又易行,仲有好東西吃!

出發前準備

嘉頓山之名,其實就係大大個「嘉頓」寫喺大廈上嘅前嘉頓廠房後山,大家只要沿欽州街後,經過高登電腦中心,就會去到美荷樓,先唔好急住上山,美荷樓唔單止係一個小型歷史博物館及青年旅舍,入面同時有Cafe及士多,可以於士多中買定糧水上山。

美荷樓係一個小型歷史博物館及青年旅舍。
美荷樓係一個小型歷史博物館及青年旅舍。

先嘆懷舊冰室

美荷樓建於1954年,為香港最早期屋村石硤尾村,而美荷樓係當中碩果僅存H形6層高大廈,現已改建為青年旅舍。大家可以於美荷樓欣賞一下舊照片,懷愐一下過去歷史;而美荷樓下面就有一個懷舊冰室「四十一冰室」,美荷樓為石硤尾村41座,所以取名四十一冰室,當中賣老香港情懷,而餐廳以當年冰室作佈置,牆上有特色繪畫,更有多個遊戲區大賣集體回憶,包括「井字過三關」、「天下太平」、「畫鬼腳」等。食物方面當然都係懷舊特色美食,包括炸雞脾、紅豆冰、西多士等。食飽飽,有氣有力再上山!

四十一冰室無論裝潢及食物都停留於幾十年前老香港。
四十一冰室無論裝潢及食物都停留於幾十年前老香港。

30分鐘漫步上山

上嘉頓山小路位於美荷樓正門右手邊小路,難度可以話極低,全程如果唔停的話,大約20分鐘。一開始上山係超闊樓梯級,慢慢變成正常樓梯闊度。雖然路易行,但如果一直行20分鐘樓梯直上的話,都幾辛苦。建議大家可以中途休息,途中已可以望出去盡覽整個九龍景色,仲包括維港亦同時映入眼簾。經一、兩次小休後就會到達山頂,係一個休憩平台;不過大家千萬唔好諗住喺呢度睇日落,因為呢度四周被樹所包圍,反而望唔到景色,大家大可坐一陣,或影一陣相,等到日落時間,就向下走返落山,於望到景色嘅地方就可以盡覽日落Magic Hour!不過大家小心留意,有好多人都會走離開樓梯級,去到附近嘅大石上坐低欣賞,由於大石旁無圍欄,必須自己留心腳步,唔好行太出呢!

嘉頓山望出去就係全九龍美景,加埋維港盡入眼簾。
嘉頓山望出去就係全九龍美景,加埋維港盡入眼簾。
日落西山Magic Hour,20分鐘路程已經可以睇到。
日落西山Magic Hour,20分鐘路程已經可以睇到。

停留多刻兼睇夜景

大部分山大家上到去睇完日落都要急急腳入夜前走,因為怕入黑摸黑落山有危險,但嘉頓山由於位於市區,而且只要行10幾分鐘就落到山,大家睇完日落唔使急住走,好多人都會直接等睇埋最靚九龍、香港區夜景。呢處角度望出去,可以盡覽香港市區壯觀夜景,密麻麻嘅大廈加上街道、馬路嘅光影,構成最美夜景!不過提醒大家兩點,第一係入夜後會有蚊,大家會有所防備,帶定蚊帕水驅蚊;其次係落山山路無街燈,如果大家無頭燈的話,用電話電筒其實都足夠,所以要確保電話有電,唔好掛住影相用晒啲電呢!

夜景唔一定要上到山頂,近近地深水埗後山原來已經有。
夜景唔一定要上到山頂,近近地深水埗後山原來已經有。

深水埗掃街食小食 

落山之後當然要食晚飯啦,深水埗係香港平民美食天堂,單單掃街食小食都一定肚滿腸肥!其中小食之首就係「合益泰小食」連續多年被選為米芝蓮推薦食店,腸粉同豆漿冠絕全港,一定要試!另外仲有嘅美食包括陳記魚蛋、維記咖啡麵食、劉森記麵家、坤記糕點、新香園、公和荳品廠等等,尤如一個另類夜市,別有一番風味!

合益泰小食連續多年被選為米芝蓮推薦食店。
合益泰小食連續多年被選為米芝蓮推薦食店。
陳記魚蛋同樣聞名全港,其中辣醬更係名不虛傳。
陳記魚蛋同樣聞名全港,其中辣醬更係名不虛傳。
老子號公和荳品廠,出名賣豆製品,買返屋企再食都得。
老子號公和荳品廠,出名賣豆製品,買返屋企再食都得。


【立即讚好】全新 Yahoo 旅遊 Facebook 專頁

Yahoo 旅遊以全新樣貌登場,Facebook 專頁當然同時煥然一新!立即讚好,每日睇盡旅遊新資訊!

你可能還想看