近日疫倩仍未完全受控，間中尚有零星個案，大家每逢星期六、日都會搵啲郊外地方玩。不過大家之前有眼見，各個熱門行山地點都擠到水洩不通，又多車又多人。然而其實大家身住嘅各區都有唔少後山可以行，唔一到要山長水遠去到郊區先行得。今日就介紹大家去青衣後山，半日遊可以輕鬆睇日落，仲有大橋靚景襯托呢！

出發入口

從青衣機鐵站，乘坐巴士248M ，15分鐘左右就去到長宏站，呢度係出發地點，大家如果要買水買糧，或者食少少嘢，可以去長宏入面嘅屋村商場補給先。

青衣自然徑超易行

準備好晒，可以由長宏巴士站旁馬路寮肚路上斜開始行，呢條名為青衣自然徑全長6.4公里，由於屬完全規劃行山路線，設施完善，沿路有野餐區域、涼亭、觀景等。初段上斜屬樓梯，兩旁都有扶手亦有樹蔭，所以雖然樓梯較急但唔長，急衝一陣就上到第一個Check Point。

回歸紀念亭

青衣自然徑於1998年完工，由於適應回歸，山上有一個涼亭名為「回歸紀念亭」，於四周仲有美景就係汀九橋及油柑頭一帶景色。於紀念亭可以休息一會，回復剛衝上山嘅體力。休息過後，可以再沿右手邊山路上行，斜度不高，可以慢慢行，兩旁都有大樹遮陰。大約行多15分鐘就會見到樓梯，再按樓梯行多15分鐘就會上到觀景台，四周有唔少運動設施，及長櫈，大家又可以坐低休息兼乘涼。

登寮肚山

離開觀景台再向山行，就係寮肚山，旁邊會經過野餐區，有自備食物嘅朋友可以坐低食嘢飲嘢補充體力。而野餐區仲可以望出去見到青馬大橋及汲水門大橋，另一邊則係望青衣、葵涌等地區。

2號觀景台

離開野餐區，落一小段山路再緩緩上山就係2號觀景台，有長櫈供人休息，不過呢度四處被樹木環繞，睇唔到景，建議直接跳過去此程目的地，睇日落。往上走一小段，搵清楚「1號觀景台」方向，沿路一邊行一邊會見到青馬大橋等景色，最後就會登上1號觀景台，於此處就可以對正青馬大橋及馬灣，太陽將會於大欖位置中緩緩向下，如是者構成一個大咸蛋黃陪伴青馬大橋靚景。呢個行程另一好處係，就算睇完日落，天色昏暗都唔怕，因為呢度再落山，行返出青衣大馬路都係20分鐘左右，全程大路而且有路燈有長櫈，就算大家無頭燈都一樣無問題，再保險啲就用電話內置電筒已經搞掂。

總結

青衣自然徑規劃完善，指示清楚，可以話係極為易行嘅山徑，全程有唔少休息點，亦有自動販賣機，唔怕唔夠水。加上位於青衣市區，屬葵青區比較優質而易行嘅行山徑，作為新手或者純粹周末出去走動下，是為不二之選！

【立即讚好】全新 Yahoo 旅遊 Facebook 專頁

Yahoo 旅遊以全新樣貌登場，Facebook 專頁當然同時煥然一新！立即讚好，每日睇盡旅遊新資訊！