【市區行山】鰂魚涌行樹木研習徑 兩個鐘欣賞本地特色植物

·3 分鐘文章
【市區行山】鰂魚涌行樹木研習徑 兩個鐘欣賞本地特色植物
【市區行山】鰂魚涌行樹木研習徑 兩個鐘欣賞本地特色植物

今日市區行山去到港島東,同大家行呢條「鰂魚涌樹木研習徑」。交通非常方便,直接去到港鐵站就可以出發,呢條樹木研習徑係香港第二條最接近市區嘅樹木研習徑,僅次於香港仔,而且相當易行,可以帶埋小朋友,寓學習於行山,了解一下本地植物呢!

樹木研習徑由政府管理打理,當中包含一眾本地植物介紹,好似呢條鰂魚涌樹木研習徑,當中有廿多種植物品種,包括大頭菜、鴨腳木、黃牙果、豺皮樟、葉紅豆等,全部都有清楚文字介紹,一般平日行山大家就算見到都唔知係咩,行呢條路線就唔怕「走寶」。

出發:港鐵站出發

話明市區行山,當然係好方便,由太古港鐵站B出口,沿英皇道向鰂魚涌方向行,左轉進入基利路一直走,右手邊就會見到有條樓梯入口,非常易搵,仲有大大個指示牌寫明係「鰂魚涌樹木研習徑」,之後正式出發!

基利路右轉直上就係起點。
基利路右轉直上就係起點。

沿引水道旁上

沿樓梯一路上,由於旁邊就係引水道,基本上一直會聽到水流聲,大家只要沿著樓梯上就可以,並無岔路;不過提醒大家落雨天或者落完雨都切勿去行,小心山洪。沿路上去就係大潭郊里公園範圍,而途中大家已經會見到旁邊有唔少植物有特別文字介紹,仲有二維碼大家可Scan嚟上網睇。

旁邊都係引水道,不斷聽到流水聲。
旁邊都係引水道,不斷聽到流水聲。

右轉大風坳上公園

去到第一分岔路,請右轉往「大風坳」路牌指示行,好快就會去到一個小公園,如果時間早會見到唔少街坊喺度晨運,而四周都係山林綠蔭,最適合作為第一個小休地點。離開後往左邊「柏架山道」路牌方向,見到一個燒烤場,前行會經過兩條小橋,下面就見到引水道,提醒大家唔好貪得意落去玩水,危險!

第一個分岔路,右轉上大風坳。
第一個分岔路,右轉上大風坳。

戰時遺蹟:作戰爐灶

再一直前往,就會去到一個平地,有兩排整齊石爐灶,非常特別。原來於1938年日本佔領廣州時,英軍就已經於此處建立備戰設施,大部分都已消失,唯獨呢個戰地用廚房仍然保留。不過原來當年日本入侵,十多日就成功佔領香港,呢堆爐灶係完全無使用過。大家可以盡情參觀打咭,離開之後往前直行一陣,就會見到有另一個遺蹟,係當年嘅「儲糧倉」。

兩排都有十分整齊嘅作戰爐灶,為當年英軍所建。
兩排都有十分整齊嘅作戰爐灶,為當年英軍所建。

林邊屋賞紅磚建築

研習徑開始落斜往「柏架山道」,大家最後一站就係一棟英式紅磚屋。呢座就係「林邊屋」,1922年時用紅磚興建,前身用作太古糖廠職員宿舍,經近百年時間,無數次翻新維修之後,目前已經成為林邊生物多樣性自然教育中心。教育中心平日免費進入,入面展示本地不同生態、動物、植物介紹,亦展示多種檢查植物用嘅工具等,平日難得一見。

有近百年歷史嘅林邊屋,為傳統紅磚屋建築。
有近百年歷史嘅林邊屋,為傳統紅磚屋建築。
當中有唔少本地生態,包括動植物介紹。
當中有唔少本地生態,包括動植物介紹。

終點:返回鰂魚涌

最後離開林邊屋,只需要沿路一直落斜就會返到去英皇道,非常簡單,呢條路線一直都係樓梯及斜坡,好易行,而又別具教育意義,好啱作作親子行山活動!

路線圖
路線圖

【立即讚好】全新 Yahoo 旅遊 Facebook 專頁

Yahoo 旅遊以全新樣貌登場,Facebook 專頁當然同時煥然一新!立即讚好,每日睇盡旅遊新資訊!