市區行山系列，希望幫大家發掘一啲行山路線，可以極近公共交通及市區地點出發。今期介紹港島南，去到黃竹坑，只要一出港鐵站就可以搵到出發點，即時開始，就係南朗山。

極易行全程樓梯

南朗山又名「海洋公園山」，因為喺正海洋公園對面山頭，全程都係行樓梯，十分易行，最高點只有284米。雖然唔係政府規定郊野公園，不過都有好多休息地點例如涼亭、長椅，沿路都有樹陰。建議大家下面4、5點出發，上到山啱啱好可以睇黃昏Magic Hour！

出發：港鐵站出發

要行南朗山，如今非常方便，因為有港島南線。只要直接坐在黃竹坑B出口「南朗山道」，上去經過行人天橋，然後跟住「南朗山道」斜路直上，沿路會經過黃竹坑港鐵車廠。行到山道盡頭會見到一所國際學校，右轉上山，開始行程。

全景觀景海洋公園

於南朗山徑入口開始緩緩上山，一開始就會見到一個小公園就係「南朗山休憩花園」，基本上都係一個小涼亭，大家就知有無行錯路。出發之後，往右邊望就會見到全個海洋公園，尤其山頂上面嘅機動遊戲區域，一覽無遺，而平日如果公園有開門，仲可以隔住一個山頭聽到機動遊戲上遊人嘅尖叫聲，劃破長空傳入耳中呢。

布廠灣睇百船靚景

再沿樓梯一直上山，眼前突然開揚，就係望到下面布廠灣景色。布廠灣為避風塘，背景為香港仔，可以一次過睇晒全個避風塘，見到過百隻遊艇泊於布廠港，如果近黃昏時間，仲已經可以望到遠遠南丫島等離島一片橙海，為一大打卡位，不能錯過！

路程開始崎嶇

望過布廠灣，休息一會就可以繼續上行。慢慢發現樓梯開始變得唔公整，因為上山頂嘅樓梯為以前村民自己修建，所以比較唔平穩及崎嶇，不過都唔算難行，可以慢慢上山。上到去一個分叉路，先去左邊南朗山山頂，上面有無視電發射站，其實唔太好影，所以打個轉就可以返落去分叉路，今次行右邊，就係一個直升機坪，呢度先係此行終點站。直升機坪十分開揚，四面環海，望到海洋公園、香港仔、離島、鴨脷洲、玉桂山等，時間仲啱啱好係日落時間，絕對係非常靚嘅打卡高位！

一條線上落簡單

打完卡就可以打道回府，只要沿路折返就可以，無其他岔路，加上樓梯公整，就算已經入黑，有基本電話大燈都可以無難度落山，返回黃竹坑市區！

路線：黃竹坑港鐵B出口>南朗山道>南朗山休憩花園>遠眺海洋公園>布廠灣>南朗山山頂>南朗山直升機坪>黃竹坑港鐵站

全程：4.5公里

需時：3小時（連休息時間）

難度：初級

來回交通：黃竹坑港鐵站

【立即讚好】全新 Yahoo 旅遊 Facebook 專頁

Yahoo 旅遊以全新樣貌登場，Facebook 專頁當然同時煥然一新！立即讚好，每日睇盡旅遊新資訊！