雅虎香港新聞 帶領社民連議會外抗爭 吳文遠：要做爛頭卒、烏蠅、曱甴
社民連主席吳文遠是近日的話題人物，他發起眾籌於《蘋果日報》賣頭版廣告「問候梁振英」，稱42小時內錄得988名市民捐款逾16萬元。有人問：賣完一日廣告，大家笑完，又可以改變啲乜？
吳文遠說：「縱使你不會震撼政權，不會傷及梁振英，但透過這個過程，群眾覺得有份參與，有份抵擋。」他認為，在政治氣氛低迷、群眾對前景感絕望下，「令香港人覺得，自己可以做啲嘢。」
吳文遠有三宗官司在身：包括：披露民政事務局前常任秘書長馮程淑儀遭廉署調查違反《防止賄賂條例》、掟三文治案被控普通襲擊、反釋法遊行被控煽惑他人在公眾地方作出擾亂秩序行為。他很可能無法再參加選舉，或者被DQ，加上黨友「長毛」梁國雄和黃浩銘同樣有幾單案在身，吳文遠深知，社民連的前路是：議會外抗爭。
吳文遠說，他們要做爛頭卒、烏蠅、曱甴……
「問候梁振英」頭版廣告刊出後，梁振英在Facebook提出質疑，吳文遠說：「佢而家嘅反應係我哋預期之內，就係佢好嬲、feel offended，用不同渠道反擊。愈反擊，愈突顯到佢自己嘅荒謬。」
廣告提及的「香港人忍耐力有限公司」，梁振英質疑該公司並不存在，稱已委託律師舉報，吳文遠稱不害怕被控告，「呢件事第一日開始做，我哋預咗梁振英肯定會告，所以我只可以同各位講唔使擔心。一個地方前特首、前首長，因為一個挪揄佢嘅廣告嘅一句說話，而要去舉報、出動律師，呢個已經夠無稽、夠搞笑、夠落佢面。」
梁振英3月起在Facebook點算《蘋果日報》廣告，吳文遠說，看到後已想搞眾籌賣廣告，於是與《蘋果日報》法律部商討，之後正式啟動。他曾撰寫一篇文章，但賣廣告的話內容未能過關，於是他集合網民意見，由他修訂稿件再徵詢律師，設計由社民連成員操刀。
吳文遠續說：「點搞笑都好，成件事要針對嘅就係，梁振英作為全國政協副主席同前特首，佢係有身份、地位同公權力。佢咁樣做，基本上係想整死《蘋果》。 」
眾籌的熱烈程度超出預期，吳文遠本來只打算在內頁賣廣告，後來決定刊頭版，「反映了兩件事，一係佢好黑人憎、是人民公敵；第二，很多人在截止後說，可惜捐不到錢、買不到報紙，群眾好著緊參與，想be part of something。」吳文遠曾在社民連的直播中提及，有一名學生捐了20元後，向吳文遠說對不起，因為沒錢，只可以捐20元，吳認為這正正反映了群眾無論如何都想參與的心態，「令到啲人喺低氣壓嘅政治壓迫底下，都覺得自己可以做啲嘢。唔係多，但起碼做啲嘢。」
吳文遠4月8日凌晨，在旺角直播購買新鮮出爐的《蘋果日報》：
這是社民連在議會外抗爭的一種方式？吳文遠說，啟動眾籌刊廣告是一件很簡單的事，未算得上抗爭，但這正正是一個在議會外群眾充權的例子，「在目前的政治空間底下，議會內很多事情做不到，在議會外以不同形式都要諗計仔去做……眾籌每人幾十元、一嚿水，去參與一件事，出來的效果就是有整整9萬幾個人買報紙去支持這件事。」刊廣告當天，《蘋果日報》發行逾9萬份。
吳文遠2009年加入社民連當義工，2010年擔任副主席，2016年擔大旗做主席。目前，社民連的三大領導：吳文遠、長毛、黃浩銘都有官司纏身，在案件解決前都不能參選。即使可以參選，當DQ已成常態，吳文遠亦預想到社民連未必可進入議會體制，「尤其長毛已經俾人DQ嘅時候，佢（政府）可以話你哋係一樣都得，因為連眾志都係咁，周庭都被DQ。」但吳文遠不會為此過於憂慮，反而思考：社民連在沒有議會平台的情況下，可以怎樣推進議題。他的答案是：要做爛頭卒、烏蠅、曱甴……
吳文遠解釋：「對政府嚟講，我哋係烏蠅、曱甴，喺度猛咁纏住你。冇我哋班好似傻仔，或者爛頭卒，係度頂吓頂吓、拮吓拮吓，群眾永遠都唔會有信心。政權你連嬲都唔嬲佢、煩都唔煩佢，佢就更加放縱、更加放肆。」
街頭活動一直是社民連的標誌，遠古有長毛抬棺材，近年是2011年七一遊行後社民連在干諾道中靜坐，導致中環交通癱瘓，「嗰時被全城人鬧、被民主派割席。到了2014年，原來塞馬路係食生菜，仲話你唔夠激。」但年輕人覺得抗議示威過於表面似做Show？吳說：「我梗係知道我哋廿條友係禮賓府示威，林鄭月娥睬我哋都生臭狐啦，但係你連呢啲最基本都唔做嘅時候，冇counter voice嘛。你明知政府講廢話，你都要有條友出嚟駁佢先得，就係透過呢啲行動去反駁。」
社運代價愈來愈大，吳文遠指，由最初的守行為、罰款、社會服務令，到現時的坐監，由數星期至數月、數年。面對政權壓迫，「各自成員也好，或者作為團體也好，要盤算和衡量自己能夠做得幾多，推得幾多得幾多。」
現時社民連捲入的官司超過10單，為何眾多政黨之中唯獨社民連面對如此多官司？吳文遠說：「因為我哋抗爭一係做得比人多、一係做得比人激。做得多，就有多啲機會俾佢入你。社民連每個禮拜都有行動，佢（政府）是但抽一樣都可以拉到你。」
這可就是他們的政治本錢？打官司要請律師，訴訟費用一大筆，以往長毛每個月會捐出議員薪酬中的5萬元，作為社民連營運開支。長毛被DQ後，社民連官司有增無減，錢從何來？吳文遠舉例，七一遊行籌得30多萬元，但其實一單官司已經耗盡，現在是「勒緊褲頭，慳得就慳」。
除了經濟困難，靈魂人物被捕，社民連會否失去支撐、街頭活動如何繼續？原來，支持者有時也會勸吳文遠：「你再咁嘅話，真係冇架啦，又選唔到議員、又做唔到嘢。」吳文遠卻認為總會有人頂上，黨內任何一個人都能勝任主席，「永遠不能遷就佢（政權），你遷就嘅話，你就會慢慢地消聲匿跡。當你係群眾領袖嘅時候，都有避忌或冇信心，就不能預期群眾會行得前過你。」
42歲的吳文遠，他的出身其實並不爛。
他在香港出生，12歲舉家移民新西蘭，曾就讀澳洲墨爾本大學，擁有機械工程和精算及財務雙學士學位，一直任職跨國企業的策略顧問，曾於世界各地工作，2006年決定回港居住，吳文遠說：「全世界周圍飛，最後都係選擇返嚟香港，我掛住香港，我鍾意香港。」他2012年因為參選立法會，放棄了新西蘭及澳洲國籍。
高薪、高學歷，看上去就像人生贏家，為何選擇從政兼做爛頭卒搞到自己一身官司？吳文遠說，他從政前後的收入不是秘密，但他不願意製造一種偉大犧牲的形象，「唔係好鐘意講放棄咗年薪幾多，我唔係叫放棄，係選擇。經濟上愈有能力的人，愈能夠付出更多去參與政治或抗爭。」
吳文遠在掟三文治案初審被裁定罪成當日，如此陳詞：「正因我比很多人幸運，有條件做不同的選擇，我更加有責任站出來。當涼薄的執政者無視社會疾苦，我能為社會弱勢做點小事，爭取基本尊嚴，我心感榮幸。」吳文遠強調，他不是要群眾無條件去衝，明白每個人都有自己的難處，只鼓勵有能力承擔的人參與抗爭。
掟三文治案，吳文遠本來上訴得直，但律政司決定上訴至終審法院，吳文遠批評：「第一，用公帑燃燒時間同錢；第二係有仇必報，唔肯認錯，不但冇就上訴庭判詞反省，反而再上訴，係好幼稚同不智做法。」吳文遠對此官司滿懷信心。
雨傘運動後，香港社會瀰漫著無力感，本土派被打沉，吳文遠嘆氣說：「梗係唔好啦……激進泛民試過又唔得，舊有民主派更加唔使依賴，本土一伸個頭出嚟就俾人斬，變咗嗰種無力感、失望，慢慢有部分會推向犬儒。」吳文遠說，年輕人即使不支持社民連也不要緊，他樂意見到青年支持香港眾志或其他本土派。提及「犬儒」兩字時，吳文遠顯得憂心忡忡：「我反而擔心，後生仔唔係話唔撐社民連，係乜人都唔撐，只係撐喜茶、撐抖音。年輕人少咗係真，唔係因為社民連唔受年輕人歡迎，係政治愈嚟愈唔受年青人歡迎。」
年輕人要怎樣做？「最低限度：唔好放棄關心。我明白誘惑好大，去深圳買喜茶、淘寶好過癮、咩都唔使諗，但起碼心態上唔好放棄關心。關心要有認知，你喺你身邊接觸嘅人去講，有誤解咪反駁，Instagram、Facebook Share都已經係（關心）。出唔到嚟遊行唔會怪你，但如果你諗住hea的話，不如轉個方法想想：出嚟行兩三個鐘當做下運動。」
吳文遠沒當過區議員、沒當過立法會議員，似乎仍未能走入群眾展視政治魅力。他卻說：「因為我唔overpromise嘛。」吳續說：「今時今日如果喺香港，你要討好群眾嘅話，只要講佢哋啱聽嘅嘢就得，同你真係要做想做嘅嘢，或者期望社會改變係兩回事。」吳文遠曾參選2011年區議會選舉、2012年和2016年立法會選舉，三次均落敗，他說，2011年社民連內部分裂，黃毓民退黨創立人民力量，而2012年他作為新人參選香港島時「根本冇諗過會贏」，2016年雨傘後正值新舊之爭，但他也笑言不排除是自己魅力不足。
吳文遠強調，他並無批評其他政黨的意思，而是有感現今香港政治制度的現實情況，有心的民主派人物不能執政，只能不斷向政府爭取，接受與否由政府決定，市民同樣明白這樣的政治難處，「你就算講啲嘢，政府唔聽你都吹佢唔脹，啲人都唔會怪你……你見到民主派，過去十幾廿年，唯一共同嘅綱領咪係民主、平反六四，但係呢類之外，有好多真係對社會的分析、或者認為點樣先可以解決社會問題，好模糊，個個都講差唔多、都爭取唔到，都唔需要特別負責任。」
吳文遠認為，overpromise是民粹，「市民都知你做唔到，只要你講嘅情感上啱聽，覺得你了解佢嘅困境，就投你。」他以近日的醫療爆煲為例，部分政治人物將醫護人員和市民的不滿歸於每日150個新移民，「十幾廿年嘅問題，居然shift到去話係因為150個新移民，基本上係disproportion。市民甚至乎有醫生對此嘅感覺係real emotion，你唔好理佢有冇偏見、歧視，佢係real emotion，人總係咁，係感性嘅動物。」
吳文遠說，社民連並非議席主導的政黨，不需要為勝算而遷就想法，但他重申：「我唔會話社民連好清高，我哋都係政黨，都係想贏議席，但議席唔係我哋嘅目標，而係組織群眾、講番我哋講嘅嘢，令到群眾開始愈來愈明白套論述、社會價值觀、行動綱領。」吳文遠又稱：「就算你點支持我，話投我票都好，要話清楚俾你聽：如果唔係，就唔係。唔好話因誤會而投我票，我會調返轉頭說服佢。」他說，社民連將會派人參選年底區議會選舉，現正展開地區工作。
回望過去在社民連的10年，吳文遠最引以為傲的是：「整體的政治信念和價值觀都是沒有改變的，基本上要捉到社民連前言不對後語，或者今天的我打倒昨日的我，是非常困難。」最遺憾呢？吳文遠喝一口檸檬茶，黯然地道：「雨傘運動後，好可惜，始終一直都不能實質連繫抗爭的人，不能凝聚他們，甚至壯大組織。」
觀看原文： 按此連結
