平民鞋店大整蠱 扮高檔品牌 潮人集體中伏
美國一個連鎖平價鞋店，喺加州貴價地段、一個上手係名店嘅鋪位，
開咗一間pop up store。
行高檔路線？係！
不過唔係轉型咁簡單，背後有陰謀嘅……
佢地先改過個店名，由原本嘅Payless轉成諧音Palessi；
開店當日搞個party，請一堆KOL出席，十足名店開幕一樣。
然後將自己嘅平價貨，擺喺呢間鋪度賣，
擺位當然唔係散貨場咁，一個鞋架任你揀啦！
最後再將標價提升n倍。
有對本來賣20蚊美金嘅運動鞋，mark up到640蚊！搞掂！
喂，d客唔識分嘅咩？真係唔識！
頭先講嗰對鞋，真係有人買，仲話好正！
間鋪開咗幾個鐘，做咗3000蚊美金生意。
而呢一切都係一個局，就係用嚟拍片做廣告，
証明平價鞋鋪都有好嘢，
收咗嘅錢都會退返俾呢班水魚……sorry，客人先真！
呢班「時裝人」受訪時一臉驚訝，真係睇人中伏最開心～～
話時話，呢個實驗證明扮高檔品牌有得做，
不如真係轉型啦，仲好賺呀！