【年底同宣萱結婚？】 古天樂親自回應瘋傳婚訊

無綫神劇《尋秦記》搵咗古天樂（古仔）及林峯做男主角，而女主角就係宣萱及郭羨妮，相信好多觀眾仍然記憶猶新。其實古天樂同宣萱除咗《尋秦記》之外，佢哋仲曾經合作拍攝《天地男兒》、《刑事偵緝檔案4》及《餐餐有宋家》等劇集，係大家心目中好登對嘅螢幕情侶。

好多人都知道古仔擁有一間經理人公司，而宣萱上年亦都正式簽約成為合約藝人，二人本身已經老友鬼鬼，而家仲簽約成為旗下藝人，絕對係值得開心。而近日更有網民於網上瘋傳古天樂將於今年年底會與宣萱結婚。

當大家網上瘋傳得熱哄哄嘅時候，噚日(7月15日)，古仔就出席由劉德華擔任監製兼主演電影《掃毒2天地對決》嘅慈善首映禮。記者梗係唔會放過機會問古仔，問年底娶宣萱呢件事是否屬實。古仔都好識做即時回應記者發問並回答：「當然唔係，網上咩都可以傳，唔係事實。」

睇嚟今次對於古仔親自否認結婚一事，令到好多網民大感失望。