幾百呎Warm過大屋 裕美5星級閨房 泰正

闊落露台擺放了枱、櫈及梳化等,充滿泰國風情,深得裕美歡心。
闊落露台擺放了枱、櫈及梳化等,充滿泰國風情,深得裕美歡心。

經營網上珠寶店兼是700萬私樓業主的裕美,竟然不愛1,800呎的西半山海景屋,堅持「龍床不及私竇」,反而視現時租住的400呎、既沒豪裝亦不設會所的40年西環舊樓為5星級的家,更扁嘴「投訴」豪宅只會令人空虛、寂寞,她揀樓和揀男友同樣另類。

藝人裕美以2萬多元月租堅尼地道酒店式400呎單位,大門一打開,先見寫住「Welcome」的窩心黑板,右邊有僅可容納1人的洗手間,左邊則是開放式廚房。再行前幾步,就是書枱及擺了雙人床連衣櫃的睡房,換衫時不想被男友偷窺,就拉埋床尾的活動趟窗,瞬間變成1廳1房。雖然Studio Flat面積僅200幾呎,但五臟俱全,加上她雜物不多,更以白色為主調配微黃燈光,反予人暖暖的感覺。

露台闊落開P都得

新居最大彩蛋,就是隔音玻璃門後的逾200呎露台,這個充滿泰國風情的小天地,擺放了4人木枱、櫈及2張木製梳化,空間闊落可容納20人,足夠搞BBQ派對,亦可跟摯愛把酒談心,裕美說:「呢度感覺好溫暖、好平靜,朋友話好似去咗泰國咁,我每次返嚟都唔想再落街,就算傾公司嘢都係喺呢度開會,可惜業主唔肯割愛出售。」

豪宅太大似圖書館

她大讚這個家值滿分,遠勝男友麥當勞道的逾6千萬豪宅:「我租呢度係想保留番寧靜空間,絕對唔關畀佢阿媽趕走事。」而重點是愛上單位的大露台,可讓2隻愛犬自由狂跑及曬日光浴,曾住過西半山及跑馬地的她又「力數」豪宅不好住:「嗰度係好大,但好似圖書館咁,完全冇家感覺,我之前一個人都租過羅便臣道,嗰度成1,800呎,月租7、8萬,全部都係落地玻璃,裝修新淨,不過住得令人好空虛、寂寞,嗰時我日日好早出門、好夜返屋企,租咗4、5個月頂唔順要搬走。」

床尾的趟窗一拉埋,就變成更衣室。
床尾的趟窗一拉埋,就變成更衣室。
打開門,就見到門口有塊寫住「Welcome」的歡迎黑板,相當有心思。
打開門,就見到門口有塊寫住「Welcome」的歡迎黑板,相當有心思。