廖啟智逝世︳幼子抗癌3年 5歲離世 曾崩潰痛哭「冇得再幫細佬冚被」

·2 分鐘文章
廖啟智逝世︳幼子抗癌3年 5歲離世 曾崩潰痛哭「冇得再幫細佬冚被」
廖啟智逝世︳幼子抗癌3年 5歲離世 曾崩潰痛哭「冇得再幫細佬冚被」

癌魔對廖啟智一家太殘酷,智叔去年底因為身體不適睇醫生,發現患上胃癌,幾個月間已病入膏肓。而智叔同太太陳敏兒嘅細仔廖文諾因血癌逝世,生命只有短短5年。

廖啟智1979年考入TVB藝訓班,後來與同班同學陳敏兒拍拖,1987年結婚。婚後智叔同敏兒育有3個囝囝,本來一家五口幸福美滿。2003年,當時3歲嘅細仔文諾發燒久久未退,後來證實患上血癌。治療過程令文諾受盡煎熬,智叔夫婦當然更唔好過。有一段時間佢地一家搬入沙田以方便送文諾去威爾斯醫院,智叔更要兼顧工作同照顧三個仔,朝早送完返學之後再去醫院,夜晚去電視台做主持,凌晨時份收工,日復一日。

文諾患病令一家人生活完全改變,淡出幕前多年照顧家庭嘅陳敏兒受訪時提到,文諾患病前家庭生活好好,大仔文哲同二仔文信嘅功課會跟到足,一家人有時間又會去旅行。但係之後因為出入醫院,無時間照顧另外2個仔,學校親子課外活動無法參加,甚至有時要當時讀緊小學嘅文哲自己坐地鐵放學。兄弟之間爭吵嘅時候,哥哥更試過對文諾講「有病大晒呀!」。

文諾病情反反覆覆,最終喺2006年4月逝世。向來低調嘅智叔同敏兒喺教會為文諾舉行告別儀式。文諾離世,加上自覺對2個仔未夠好,陳敏兒曾經因為感到內疚而患上抑鬱症,有過尋短嘅念頭,後來靠朋友支持同信仰先撐過去。

智叔同樣唔好過,佢試過反覆去諗咩原因令文諾患病;文諾逝世後,習慣收工返屋企後會幫3個仔冚被嘅智叔,有一晚見到文諾張床空空一片,突然泣不成聲,喊住話「冇得再幫細佬冚被啦」。好在二仔識講笑安慰「你係全屋最老,咪會最快喺天家見到細佬囉」。

廖啟智同陳敏兒喺結婚20年再拍婚紗照,希望能夠重新出發。
廖啟智同陳敏兒喺結婚20年再拍婚紗照,希望能夠重新出發。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!