張婉婷向新片主角公開道歉

導演張婉婷執導紀錄片《給十九歲的我》引發風波,先後被受訪主角阿聆及阿佘指控片方不顧反對意願堅持公映,再被「牛下女車神」李慧詩聲討未經同意擅用訪問片,導致電影急急停映。張婉婷昨晨於電台節目向阿聆公開道歉:「對佢唔住。」並隔空對阿聆說:「你開心番啲啦,我哋依家唔做喇。」她又向李慧詩表示:「如果李慧詩唔知情,我都想打電話同佢道歉。」

此外,昨日再多一位片中主角「香港小姐」(片中稱呼)發文,指當日團隊聲稱「所有人已經簽咗名,淨係得你未簽」,令她在未清楚情況下急急簽署同意書:「佢哋完全冇同我交代成個事情嘅來龍去脈,所以我一直以為呢一套電影全部都係好評同埋一切都好順利。我當時就抱着一種心態,就係話既然係一個咁有意義嘅電影啦,公開自己少少嘅黑歷史都唔係話唔可以接受嘅。」又表示因早已離港生活,故電影上映對她未有太大影響,不過亦明白阿聆的處境:「唔應該將自己嘅快樂建立喺人哋嘅痛苦身上。」網上亦流傳一段影片,是前晚張婉婷在旺角戲院出席電影分享會時,有名情緒激動的光頭男邊行邊爆粗狂鬧張婉婷,張婉婷即被嚇親,並在工作人員護送下離開戲院。