張寶兒任《聲夢傳奇》造型師 出片講解服裝搭配靈感 網民唔賣帳：無法突顯學員特色

自從「億萬千金」張寶兒（Bowie）榮升人妻後，佢已鮮有參與幕前演出，原來早前佢已經靜靜地轉行擔任造型師，先後為「東涌羅浩楷」利愛安（Kirsten）進行大改造及《聲夢傳奇》學員擔任形象指導，不過網民對佢為學員嘅造型搭配反應唔太正面，仲話佢未夠班做服裝指導及製造大型「時裝災難」。噚日Bowie喺YouTube上載影片，分享《聲夢傳奇》學員嘅畢業演唱會《聲·夢飛行First Live On Stage》嘅後台流程及服裝嘅搭配靈感。

喺影片，Bowie首先就帶大家穿梭演唱會後台，之後講自己點樣根據學員嘅優點及特質去為佢哋搭配服裝，仲逐一講解服裝背後嘅靈感，例如姚焯菲（Chantel）嘅漸變橙黃色毛毛裙，佢就話呢條裙係其中一條佢覺得超靚嘅裙，所以好早已經落入清單。其後Bowie呢個羽毛設計自2019年開始好多品牌都有沿用，仲話呢個設計唔容易handle，因為如果唔夠可愛嘅話係著唔到呢條裙，喺今次嘅資源上嘅選擇，同埋製作方同各方都認為呢條裙係最啱Chantel。

Bowie今次嘅工作唔簡單，同埋佢好努力去同大家講出佢嘅想法，雖然有唔少網民留言話好欣賞佢嘅努力同大讚佢今次做得好好，不過部分網民依然唔賣帳，繼續留言聲討佢，例如「啲衫完全唔靚，有啲簡直核突又論盡，無法突顯學員特色！你自己有沒有去聲夢及各學員的 fb 睇吓觀眾對你的負評！重（仲）好意思喺度自我吹噓！希望你高抬貴手，以後唔好再搞啲小朋友啦！你根本未夠料去handle 呢個演出，放過佢哋啦，好嗎？」、「衫完全吾（唔）掂，楼（樓）上啲人為讚而讚，奇怪，無言」及「我自己是一名小菲象，老實說我真的對你為Chantel 所設計的毛毛裙頗不滿意的，雖然Chantel 可以 carry 到條毛毛裙，但就真係覺得唔係太襯她國民初戀的公主形象呢！那條裙真的完全凸顯唔到她的形象，似乎你有偏心其他學員多啲，只是求其找條裙讓她穿便算，她那條直桶型的毛毛裙不好看，又唔襯佢。」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！