張寶兒湯洛雯 硬撐另一半拉票

東方日報
·1 分鐘文章
張寶兒笑言會幫袁偉豪襯靚衫等攞獎。
張寶兒笑言會幫袁偉豪襯靚衫等攞獎。

今年視帝之爭暫時以王浩信領先群雄,氣勢力壓爭取「冧莊」的馬國明與「天堂哥」袁偉豪,搞到兩位「阿嫂」要幫口拉定票!馬國明女友湯洛雯錫住另一半,她笑說:「私心梗係想馬國明贏啦,但佢對獎項都冇所謂,我哋兩個都好隨緣。」自爆反而另有着緊的人:「最想見到高海寧攞視后,呢兩年佢接咗好多唔同類型角色都處理得好好,又不斷增值自己,好值得攞獎。」認真姊妹情深。

至於「袁太」張寶兒昨日受訪時亦力撐另一半:「作為太太就梗係支持丈夫啦!不過王浩信喺《踩過界II》做盲俠,飾演冇咗視力嘅角色都可以做到咁有魅力,係好值得欣賞。」又指會在背後默默支持:「到時會幫佢襯吓衫,煮定飯等佢返嚟消夜!」

另外,袁偉豪與黃翠如在劇集《使徒行者3》再續前緣,鏡頭後同樣有默契!他在社交網分享短片,見2人穿上病人服飾在做運動,舉手、拗腰動作一致,有網友提議可以繼續以情侶檔拍住上發展。

湯洛雯指與馬國明對獎項抱平常心,唔怪得咁啱Key!
湯洛雯指與馬國明對獎項抱平常心,唔怪得咁啱Key!