張敬軒自嘲年紀大睇化嗌減產：今年對我係幾棘嘅一年

【on.cc東網專訊】歌手張敬軒（軒仔）昨日（28日）出席活動，講到入圍叱咤「我最喜愛的男歌手」五強，他稱以平常心對待：「今年要做晒啲功課先，之前有啲嘢講咗會做，但都未做到，因為今年年頭屋企有事，一直都出入醫院。（屋企人冇事吖嘛？）頭痕囉！老人家。我依家基本上都係做番之前簽咗約嘅嘢，冇再加新工作，每日出嚟工作都會擔心，始終我屋企得我一粒仔，好多嘢我要處理，有今生無來世，衡量過覺得屋企最重要。」他透露父親做了腳及眼手術，早前去了廣州看醫生，但行得麻麻，故今個月會搬回香港住：「我依家四處搵醫生，最近打得最多嘅電話就係打畀醫生，所以最緊要珍惜生命，唔好吸煙同飲酒，因為我爸爸以前食好多煙。」

軒仔直言近年除咗巡迴演唱之外，已經處於減產狀態，因為年紀不再年輕：「今年對我係幾棘嘅一年，屋企人好影響，但相信會好嘅。」除了家人身體外，家中愛貓早前逝世：「我媽咪當佢孫咁湊，佢全身有百幾個腫瘤，面目全非，佢係走得好痛苦。不過人同貓去到某個年紀都會係咁，所以我唔會退休，但會放慢腳步，身體要緊。」

另外，問到叱咤看好哪位，軒仔稱睇好MIRROR的Ian：「其實個個都好叻，尤其YT（周殷廷），好戥佢開心，大家識咗好多年。（但今年好多是非。）年年頒獎禮都有是非，最重要有noise，總之唔好傷到和氣同感情，我細個個年代仲犀利，所以啲人問我感覺，我冇feel，幾好睇，有生氣同有聲氣，今年樂壇好多人都好畀心機，但香港啲觀眾好似注意力唔喺香港，我明年都會加入大軍做多啲歌同出碟，最緊要係搞旺個市，百花齊放。JFYT又好MIRROR又好，唔同年資嘅歌手都有唔同嘅組合，每個人都有自己嘅受眾咁先好玩，係多元樂壇，總之唔好傷和氣。（會唔會以前輩身份叫佢哋鬧交？）唔會，後生係咪，啲人話我40歲收咗火，年紀大睇化咗唔想再煩，但呢啲係後生嘅能量，要爭取、發表同堅持自己嘅想法，係好事。」

【更多影劇新聞詳情請上東網新聞】