張敬軒演唱會|姜濤現身任嘉賓 張敬軒:佢一直冇停止令自己進步 (睇片)

張敬軒紅館演唱會現正進行得如火如荼,早前有傳MIRROR成員姜濤將於16日現身做嘉賓,但其後二人否認。不過,姜濤今晚(21日)終於驚喜現身,令在場觀眾尖叫聲不斷!

由於今晚有姜濤做嘉賓,姜媽與親友一早入場,並獲安排坐在前排位置。至於姜濤與ERROR的肥仔則於開場後才進場,並坐在控制台前,同場還有MakervilleCEO魯庭暉、蘇永康等。

「姜濤好怕醜好怕醜」

當去到嘉賓環節,軒仔介紹姜濤出場前表示,認識過有少新晉歌手,指今晚的嘉賓會不時跟他大談音樂,又會分享一些音樂短片,看著對方不停進步,「佢好得意,佢第一次見我嗰陣好怕醜好怕醜,唔係好夠膽同我講嘢,但自從認識之後,佢每一次問我嘅問題,全部都係關於唱歌同埋音樂。甚至乎,佢令我最感動嘅係,會將啱啱拍好嘅MV,或者啱啱錄好嘅歌,send俾我聽,跟住問『我有邊度唱得唔好?』佢就好似一直都未停止過令自己進步咁。」

軒仔鼓勵姜濤:我買你贏

軒仔繼續盛讚姜濤,「我覺得呢個年青人好叻,因為喺樂壇當中,你要成為一個長青樹的話,就一定要有足夠嘅鬥志,同埋好客觀咁知道自己邊啲地方叻,邊啲地方冇咁叻,將勤補拙。所以當時,我回覆咗佢一個message,我話『你要加油,我買你贏!』呢兩年,我好開心見到佢成為一位獨當一面嘅歌手,有好多支持者,雖然成長、成名嘅路,對於佢呢個年紀嘅藝人嚟講並唔容易,因為佢哋必需要喺讚美聲同埋各種批評當中,一路勇往直前。但我相信,佢會轉化成力量,成為更成功嘅歌手,今晚我好開心,可以邀請到佢,同佢一齊合唱。呢首歌,我寫嘅時候,佢都未出世。」之後兩人合唱《斷點》。

姜濤親手餵軒仔食薯條

日前,姜濤在社交平台暗示前往美國,估不到卻在張敬軒的演唱會上出現,並擔任嘉賓,軒仔表示:「全世界都以為,包括我都以為,佢已經飛咗去另一個工作嘅地方,跟住突然發現,原來佢仲喺香港,我就好想好想同你一齊,喺呢個舞台上面同你唱歌。姜濤係一個好得意嘅男孩子,每一個同佢工作過嘅人,都會好喜歡佢,因為佢係一個好俾心機,好謙厚嘅人。好奇怪,佢冇呢個年齡層嗰種「盲舂舂」嘅特質。佢咩都會問,咩都想知,咩都想學,所以我實在好喜歡呢個男孩子。加油呀!你睇今晚嘅聲勢,我諗離你自己舉行個人演唱會都唔遠。」

姜濤一如之前所有嘉賓般,向軒仔送上禮物,「我知道呢排你開演唱會,冇啖好食,(冇啖好食都唔係呢一輪),我送一款我最鍾意嘅食物俾你。」姜濤所送的是漢堡包及薯條,他更親手餵薯條給軒仔吃。之後姜濤唱出重新編舞的 《Master Class》。

原文刊登於 AM730 https://www.am730.com.hk/娛樂/張敬軒演唱會-姜濤現身任嘉賓-張敬軒-佢一直冇停止令自己進步-睇片-/320435