張敬軒「獨家制」賣飛 保證歌迷有騷睇

實名制賣演唱會飛的問題引起滿城風雨，歌迷怨聲載道，而張敬軒早在紅館開騷時，就自資7位數創立歌迷會實名制訂票系統，確保歌迷買到飛。軒仔預告年底舉行的演唱會繼續採用此「獨家制」售票方式，值得MIRROR借鏡。

張敬軒昨日與網絡女神倪晨曦、女團COLLAR成員Marf及Ivy現身西九舉行的限定店開幕活動，吸引數百粉絲「四面台式」重重包圍撐場，場面墟冚。軒仔完成26場紅館演唱會後，前日難得休息，透露與友人帶同美酒去梅窩露營兼行山，幻想去了一趟泰國旅行，雖然損手爛腳，但相當盡興。他直言今年應該沒時間出埠旅行，除了要籌備明年在美加賭場舉行的巡迴演唱會外，今年底亦會在港舉行side track騷，他說：「因為紅館爆晒，而今次係全新演出，有好多side track未派過台，覺得呢啲歌適合做細場。」

MIRROR演唱會早前採取實名制賣票掀起大風波，而軒仔早於紅館演唱會已採用實名制售票，他保證歌迷買到飛，雖然不擔保場場買齊，但就肯定買到一場，支持大家理性消費，他說：「係由自己投資嘅系統，唔使擔心個人資料外洩，所有資料都喺我手上。自己唔係新人，想回饋歌迷，多謝粉絲嘅應援。到我呢個家長級年紀，唔想大家亂花錢，得閒買吓碟、睇吓騷支持就好啦！」他表示連聘請歌迷會工作人員，都會考慮揀選非歌迷擔任，望更能持平。由於這兩年受疫情影響無法與歌迷聚會，他決定這兩年免收會費，由他自掏腰包6位數維持行政費用，全因相信有粉絲支持，他才能發光發亮：「睇到Tyson Yoshi同MIRROR搞實名制，我係感同身受，要令每個人開心好困難，技術上好困難。」

Marf撥開齊陰空氣流通

同場的Marf一改齊陰造型，獲粉絲讚靚女，她解釋指變髮只因沒時間剪髮，笑言：「撥開齊陰，空氣流通啲。」又稱粉絲對新造型的評語好壞參半，但她就覺得可提升可塑性，覺得長髮更有安全感，笑言若有角色需要她剪短頭髮，可能會日日躲在家中喊！Ivy亦笑言新陳代謝較慢，不太接受剪短髮。