張文慈執包袱 移居上海賺人仔

若無綫邀拍劇,張文慈會請假回港開工。
若無綫邀拍劇,張文慈會請假回港開工。

繼蔡少芬及鄭希怡舉家移居內地後,張文慈近日獲上海公司下聘書,邀她簽約於當地發展,力捧她做網紅帶貨,她幾經考慮終首肯。對於今次「北漂」,她直言有太多不捨,出發一刻難掩離愁別緒,要拍片記錄「重要時刻」。

近年不少藝人為「搵食」移居內地,遠有蔡少芬10年前憑劇集《甄嬛傳》成功打入內地市場,加上老公張晉是內地人,故2人早年已斥資數百萬元在北京買豪宅,帶埋3名子女在當地定居;近年則有鄭希怡憑內地綜藝節目《乘風破浪的姐姐》人氣急升,工作不斷,故決定舉家到上海居住。而一場疫症令香港娛樂圈事業幾近停頓,加上內地機會較多,故不少藝人亦開始北上搵食,不過因通關無期,很多人選擇於內地「小住」方便工作。近日有內地直播及帶貨公司主動力斟張文慈(Pinky)加盟,她幾經考慮終被對方誠意打動,初定簽約2年,雙方試行合約3個月再作最終定案。

日前Pinky已隻身出發,現於深圳隔離,待月底「出關」便飛上海展開新生活。「試用期」滿後,她會請假到橫店拍無綫劇《巾幗梟雄4》,待完成拍攝再「歸隊」。臨行前,她與親友餞行,離家出發時,與她感情深厚的菲傭感觸爆喊。

「唔適合會回流返嚟」

談到到上海發展,Pinky受訪時表示:「去到呢個年紀,要開始為自己日後生活打算。今次嘅決定除咗需要勇氣,更需要膽量去迎接未知嘅未來。雖然我喺上海有朋友,但始終人生路不熟,點都需要適應期。我通知咗無綫,佢哋唔介意我有劇開先返港開工,上海嘅公司就話如果我冇其他工作,可以將合約順延。」對於每星期要參與幾場帶貨活動,每次直播更長達4小時,她表示現時開始養聲、苦練普通話及做足功課,以免「失禮街坊」。

她坦言去年曾獨自在內地生活5個月,意外鍛煉出獨立個性:「以前出trip,我連自己瞓一間房都唔敢!依家經歷過廣州大停電,當時我沖緊涼,冷靜到識得披條毛巾出嚟睇吓咩事;又試過病到好辛苦,自己去醫院求診,總之所有嘢都自己嚟,原來又唔係咁難啫。」不過談到暫別香港,她難掩不捨之情說:「一定好掛住屋企人,尤其希望爸爸身體健康。日後如果通關,我會多啲返嚟探親,又或者試過後唔適合會『回流』返嚟。我冇結束香港嘅一切,始終香港是我家嘛!」

習慣獨處 拍拖隨緣

問到會否乘機在上海搵另一半?她突然感慨表示:「依家覺得一個人生活都可以好精彩同開心,坦白講近期都識咗啲『新朋友』,但溝通後明白去到我呢個年紀,大家都習慣咗自己嘅生活模式,待人處事各有獨特見解,唔會再強求喇。」

數年前,她曾雪卵為日後當媽媽作準備,她坦言:「醫生話既然雪咗就唔好放棄,仲有(可留)時間嘛。(搵唔啱對象,會做單親媽媽?)唔會,本身原意係想同自己嘅另一半生BB啫,我都過咗好想有小朋友嘅時間,況且依家兩個姪仔都好得意。」

張文慈帶了不少衣物及日用品北上工作。
張文慈帶了不少衣物及日用品北上工作。
獨自到內地工作,張文慈坦言不捨得家人。
獨自到內地工作,張文慈坦言不捨得家人。