張曦雯不婚宣言 搏到盡加速上位

在美國長大的Kelly當年忽發奇想來港闖蕩,搞到媽咪囉囉攣。
在美國長大的Kelly當年忽發奇想來港闖蕩,搞到媽咪囉囉攣。

女神張曦雯(Kelly)近年獲無綫力捧,逐步上位。緊張事業的她直言會把握每個機會,並向公司大派定心丸,表明暫不渴望婚姻!不過,她亦冧爆指當初對男友情有獨鍾,等了多時才「守得雲開」。

Kelly近期劇接劇,正當外界覺得她上位快,她卻自言星途不算平坦:「曾經有4、5年冇劇拍,大家完全睇唔到我,只係默默累積做主持嘅經驗,當時真係好渴望有機會演戲!」去年她突然拋下一切,出國修讀戲劇課程,展開短短約2個月的旅程,最大得着是「學識唔好怕醜」。

她深明所有機會都不是從天跌下來,所以向公司大派定心丸:「細個可能對婚姻有憧憬,但依家就冇乜渴求,亦冇諗幾時生小朋友,或者成世單身都可以活得好開心。反而事業剛起步,唔拚搏可能就會失去機會,對於自己個樣能夠出現喺劇集海報,真係難以置信!」

領悟緣分在身邊

專心衝刺事業的Kelly雖然唔恨嫁,但提起男友Mark即時冧爆,並自爆早已鍾情對方,可惜當時他未有展開熱烈追求:「嗰時我啱啱搬嚟香港,透過朋友介紹識咗佢,覺得佢好好人,開始仰慕佢。可能大家都喺美國返嚟,同聲同氣,但未有進一步發展,仲有段時間失聯!不過佢每逢特別節日都會傳短訊畀我,撞番之後約出嚟食飯,順其自然就喺埋一齊,即係好多年前識落嘅朋友,其實都有可能(拍拖)o架!」

突然出走 搞喊阿媽

Kelly在剛播完的《木棘証人》飾演貼地港女,不時開口罵人,外表看似沉着的她自言骨子裏是典型的金牛座性格,硬頸之餘又帶點衝動。提到人生最衝動的經歷,她直言是當年毅然決定搬來香港:「18、19歲嗰年嚟香港旅行,突然覺得喺呢度生活好正,返到美國同父母交代吓,唔夠1個月就嚟咗香港喇!(父母贊成?)爸爸係我嘅超級粉絲,會諗100個理由支持我,反而媽咪擔心,佢喊晒咁好唔放心,呢次應該係我最忤逆嘅一次。諗番轉頭,我當時應該考慮耐啲。」

張曦雯期望做出成績,明言會把握每個機會。
張曦雯期望做出成績,明言會把握每個機會。
Kelly自爆早就睇中男友,但醞釀多時才開始拍拖。
Kelly自爆早就睇中男友,但醞釀多時才開始拍拖。


【相關搜尋】張曦雯男友大起底