張致恒被貼街招追數 全家着草?

東方日報
·3 分鐘文章
張致恒
張致恒

欠債纍纍的張致恒被爆元朗租住的村屋遭人貼街招「追數」,為了避債,他的電話停用,疑「着草」與家人鬼祟搬走。曾經插爆他的債主Naomi揚言不會原諒對方,寧願慳番啖氣,而張彥博亦只能勸勉他「自強吧」!

張致恒(Steven)早前被o靚模馮鎵瀠(Naomi)爆「借錢唔還」,又四圍向圈中人張彥博、林盛斌等借錢,Steven口口聲聲解釋因為失業才無力還錢,又向債主公開道歉,承諾有拖冇欠。前晚再有讀者爆料,指他居於元朗的村屋外被貼街招追數,街招上是他一家3口慶生照,寫着「老千」、「還錢」的字眼。除了街招,爆料人指Steven的信箱也塞滿追數信件、紙張,更指他疑「着草」上月已經搬走,又有鄰居指他老婆雯雯沒有禮貌,鄰里關係甚差。

記者嘗試聯絡Steven,但他為避債連電話也停用,繼續潛水未作回應。Naomi昨日受訪時透露上月欠債一事曝光後,對方曾主動跟她道歉,並指會1星期內還錢,但結果冇下文,她多次致電「追數」,但電話永遠接不通,她直言已對Steven徹底失望:「搵唔到佢不特止,仲有好多網民都不值佢嘅行為,有啲仲喺社交網度話畀我聽,見到佢哋日日過緊好好嘅生活,好似去BB展買啲好貴、有品牌嘅BB用品,出入坐的士,有工人用。前幾日,我同事都見到佢喺元朗大型連鎖店度買嘢,一啲都唔慘,佢依家係用緊人哋嘅錢嚟過自己嘅優質生活,好賤格同劣質,佢點道歉我都唔會再原諒佢!真係覺得依家用粗口鬧佢都冇用!都預咗佢爭嘅錢收唔番。」

林盛斌叫盡快還清債務

身在廣州的張彥博對於好兄弟被貼街招追債兼「着草」失蹤,他說:「我都唔太清楚,佢冇聯絡過我。」原來上月他曾在內地碰見Steven,估計對方已返港,阿博坦言已盡力:「我唔敢奢求啲乜,心願係佢可以努力做番好自己,我都要喺度捱騾仔,都要搵食養家,依家人人都咁艱難,最緊要唔好影響其他人,自強吧!」另一債主林盛斌也收過Steven道歉電話,他着對方要努力工作:「佢話過咗年之後可能有嘢返內地做,我叫佢努力、爭氣啦,盡快清還所有債務,重新生活,之後就冇再聯絡過。」