強敵碰頭 互笠高帽 張敬軒自封「關愛座」 MIRROR投降

張敬軒先拔頭籌,奪得「勁爆播放指數歌曲」獎。
張敬軒先拔頭籌,奪得「勁爆播放指數歌曲」獎。

張敬軒將以「1敵4」姿態跟人氣男團MIRROR的4位成員角逐「叱咤樂壇我最喜愛的男歌手」獎,昨首度跟4位之一的姜濤同場,笑言是「樂壇關愛座」的軒仔,先聲奪人得新城頒獎禮中的「播放指數歌曲」獎,而MIRROR隊長Lokman代扯白旗,笑指就算集12子之力都未必夠揮。

昨日在「新城勁爆頒獎禮」記者會上,張敬軒首度和「4敵」之一的姜濤聚頭,同場還有Lokman、Jer、AK、Tiger和Frankie共6子,及其他唱片公司等約50位歌手,剛於10月和電台解決歌曲版稅事宜的環球、Sony Music及華納(簡稱「三大」)旗下歌手則未有出席。大會又安排軒仔、鄭欣宜、許廷鏗、菊梓喬等企第一排影大合照,MIRROR成員則在第二排,同場公布軒仔憑《俏郎君》得到頒獎禮首個獎項「勁爆播放指數歌曲」,他說:「冇預期有獎,播放率高都係因為年頭開始播。」

自我提醒有夢想

軒仔受訪時談到於「叱咤5強」以一敵MIRROR 4成員,他自嘲是「樂壇關愛座」:「開心樂壇氣氛好熱鬧,似學嘢多啲,唔會恃老賣老。(關愛座坐幾耐?)長江後浪推前浪,好似新陳代謝咁,以前都係小鮮肉,前浪推咗上岸,跟住會變番後浪,最緊要係作品好,有心思新意就有人buy。」他又覺得有年資的歌手不應故步自封,他不時會提醒自己要有夢想,似有新人感覺,又讚MIRROR令行業水準提高。

被笠高帽的MIRROR被指以人海戰術狙擊軒仔,隊長Lokman說:「冇呀,佢一個可以打低我哋4個呢!就算加埋都未必夠佢嘅力量!」不過對攞歌曲、組合獎一定有信心,Tiger更睇好隊長Lokman贏新人獎。姜濤和索爆中英混血兒表妹的舊Vlog瘋傳,他稱沒想過捧紅表妹,又談及在其紀錄片自覺疑似患抑鬱:「依家好番好多,嗰段時間可能壓力比較大先亂諗嘢。」

欣宜抱必勝決心

欣宜透露因正值生理期感到暈眩和疲累,談及三大和新城「斷交」9個月,令她有機會摘下女歌手獎,她說:「無論點,我都會以一定會贏嘅心態參與頒獎禮,先至對得住個作品!」新城知訊台執行總監程凱欣受訪時表示有邀「三大」歌手出席,但因為計截榜日,只得2個月時間可爭播放率,相對獲獎機會較低。

MIRROR 6子現身,Lokman認低威,自認同軒仔冇得揮。
MIRROR 6子現身,Lokman認低威,自認同軒仔冇得揮。