(綜合報道)(星島日報報道)最近，有傳媒人竟收到行家發的律師信，相關律師又有生意做了，起碼執番三、兩千蚊吖。 講起律師信，坊間最大謬誤為收到律師信等於畀人告，等於要變被告，等於要上法庭，等於要使好多錢。總結，等於有錢可以恰冇錢，因為法庭遊戲，分分秒秒都燒銀紙也。 是否如此？當然唔係！由收律師信到真正成為「被告」，已有排搞啦。再由變被告到排期上庭，更加等到天光。所以，冇耐性可能已悶死。 小弟三十多年傳媒生涯，收過不少律師信，有風水佬、賣假藥騙棍、傳媒地痞……等等，全部兩個字——靠嚇。使一、兩千蚊就想封你嘴或筆，等你怕咗，不再揭露佢醜態、醜事或犯法行為。有冇效？事實，大多數時候有效。因為，絕大部分市民包括傳媒人，對法律皆矇查查，誤以為收律師信等於畀人告，為怕麻煩投降。 更多識用律師信玩嘢蠱惑佬，會四圍派，當然包括被針對者的上司。因為，十個有九個上司也是怕事、怕麻煩之輩，故多數忠告當事人大事化小，小事化無，明明啱都認句錯啦。於是，濫發律師信者頻頻得米，漸成「律師信惡霸」，打橫行。反正，出封信最平一千蚊搞掂，故此愈來愈濫、愈來愈Cheap。因太Cheap，所以不少由水準極低律師包攬，英文渣到狗屁不通。 我如何處理律師信呢？其實，毋須律師信，總之我講錯寫錯，對任何人不公平，必定立即承認道歉。不過，你唔好嚇我！我收過的所有律師信，全部靠嚇，又話要登報道歉，又話要賠償名譽損失。呸！講真話揭露公眾人物或打開門做生意者醜行要道歉？返屋企瞓覺啦！發律師信者，多數心虛，根本不敢上法庭，以免自暴其醜。呢，我正是單單擺明夠膽就到法官面前對質，睇邊個死。結果，全部縮沙。 曾智華 阿碌 開咪 專欄