必食成吋厚芋泥吐司+漲卜卜軟殼蟹吐司 人氣芋圓網店進駐太古開輕食店

·3 分鐘文章

芋泥控同芋圓控注意!呢間大受歡迎嘅網店最近開咗第一間實體舖啦,每日新鮮製作台灣芋泥吐司,中間芋泥有成吋厚,夠晒真材實料。仲新增咗鹹食,好似超豐富嘅軟殼蟹配蟹柳沙律吐司、外脆內綿嘅紫芋栗子可樂餅等。手作三色芋圓亦繼續供應,買返屋企想幾時食就幾時煮。

uen cafeteria由一對年輕情侶主理,2020年開設網店賣手工芋圓,之後賣嘅芋泥吐司更成為搶手貨,最近就嚟到太古開第一間輕食店。芋泥每日新鮮製作,經過改良後而家係綿密得嚟同時又咬到芋頭粒粒嘅2.0版本。

芋泥肉鬆吐司($60)
芋泥肉鬆吐司($60)

芋泥肉鬆吐司($60)

芋泥選用台灣當造芋頭,例如之前嘅台中大甲或者而家嘅屏東高樹芋頭,加牛奶同少量糖打成,甜味自然又富芋頭香。中間嘅芋泥有一吋厚,滿足各位芋泥控!

而芋泥加肉鬆係台灣常見嘅配搭,再加上沙律醬,味道鹹鹹甜甜咁,好容易一啖接一啖就食晒一件。另外仲有賣相吸引嘅芋泥紫薯吐司($60),靈感嚟自奶醬多嘅芋泥粗粒花生醬吐司($60)等口味。麵包選用本地香香麵包出品,支持本地製造之餘麵包質素亦有保證,再加牛油煎過更香軟。

軟殼蟹配蟹柳沙律吐司($75)
軟殼蟹配蟹柳沙律吐司($75)

軟殼蟹配蟹柳沙律吐司($75)

小倆口開店為咗照顧埋喺附近返工嘅朋友,特別推出四款鹹點吐司,包括呢款最受歡迎嘅軟殼蟹配蟹柳沙律吐司。大大隻軟殼蟹炸至金黃香脆,加上一絲絲嘅蟹柳,新鮮爽脆嘅紫椰菜、生菜,酸酸甜甜嘅他他醬同蜜糖芥末醬,成為一份漲卜卜嘅足料吐司。

炸軟殼蟹香口酥脆,蟹柳就以鮮味同鹹香為主,所以蔬菜同兩款醒胃醬汁就啱啱好可以平衡返。原來因為男店主唔鍾意食菜,女店主就設計咗呢款有大量蔬菜又唔寡嘅吐司,等大家都可以食得健康啲啲。

紫芋栗子可樂餅($35)
紫芋栗子可樂餅($35)

紫芋栗子可樂餅($35)

小食就以香口炸物為主,好似呢個嚟自日本鹿兒島嘅紫芋栗子可樂餅,脆皮裡面係紫薯蓉同栗子。咬落外脆內軟綿,不時仲會有一粒粒栗子肉,甜度適中唔會蓋過食材原味。

熱情果菠蘿梳打($35)
熱情果菠蘿梳打($35)

熱情果菠蘿梳打($35)

梳打亦係店主自己調配,熱情果菠蘿梳打就係用新鮮熱情果肉、鳳梨汁、青檸、梳打水等調配而成。味道以熱情果嘅酸甜味道為主,鳳梨同青檸增添香氣,配搭梳打水嘅氣泡,非常消暑。

三色芋圓盒子($75/盒)
三色芋圓盒子($75/盒)

三色芋圓盒子($75/盒)

芋圓暫時就無得堂食,不過可以外賣未煮嘅手工芋圓返屋企自己煮。有芋圓、紫薯圓同地瓜圓,一盒約60粒,可以配埋冰糖桂花糖水($10/包)。口感偏軟糯,同芋泥一樣有保留部分芋頭肉更有咬口。

小店暫時由小倆口同屋企人經驗,因為唔少食材都係手工製作,想試吐司特別係芋泥口味嘅就最好早啲到啦。幫大家問過店主,佢哋長遠都希望可以開到間寵物友善嘅餐廳,希望早日成功啦!

uen cafeteria
地址:太古英皇道1065號東達中心11樓101號舖

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能