必食手工啤酒烤雞+脆卜卜鹹豬手!用心製作西餐廳進駐大角咀

落足心機自然有人識欣賞,呢間西餐廳主打手工意粉,口碑好到半年內連開兩店!新店仲新增唔少特色主菜,好似用本地手工啤製作嘅烤雞,塊皮脆到好似薯片咁嘅鹹豬手等等,大角咀街坊有口福啦。

Homeland
Homeland

Homeland新店位於大角咀,同年初開嘅大埔店一樣,供應自家製手打意粉、小食、主菜、甜品,同本地手工啤酒。部分主菜仲係新店限定,值得專程嚟呢邊一試。

冬陰功海鮮闊條麵($118)
冬陰功海鮮闊條麵($118)

手打闊條麵口感煙韌有嚼勁,配酸酸辣辣嘅醬汁又幾夾!冬陰功醬汁用南薑、蒜頭、香茅、魚露等多款香料製作,聞起香茅味最突出,食落味道非常豐富,辛辣香氣多變,辣度適中夠醒胃。大蝦肉質彈牙。

香脆德國鹹豬手(新店限定,$258)
香脆德國鹹豬手(新店限定,$258)
香脆德國鹹豬手(新店限定,$258)
香脆德國鹹豬手(新店限定,$258)

大大隻鹹豬手原來要先慢煮、再用大火炸,最後焗至皮脆先上枱,難怪塊皮食落又薄又脆,脆到好似食緊薯片咁!裡面嘅肉亦唔會太乾,鹹香有致。主角出色之餘配角都好加分,燒汁加咗自家Sangria落去,帶少少酸甜味更清新。酸菜酸爽解膩,最底嘅薯蓉保留部分薯仔咬口,有忌廉嘅甜味,令菜式味道更多變。

惹味啤酒釀全雞(新店限定,$228)
惹味啤酒釀全雞(新店限定,$228)

惹味啤酒釀全雞用咗吹啤啤嘅單眼佬,係一款話梅蜂蜜酒,用話梅嘅酸味減低烤雞嘅油膩感。全雞會先用新鮮迷迭香、洋蔥、蒜頭等腌過,將單眼佬啤酒倒落罐再將雞套入啤酒罐拎去焗,令雞肉吸收啤酒味,焗至皮脆肉嫩。雞肉香噴噴之餘,下面滲晒滴出嚟雞油嘅蔬菜都好惹味!

西班牙海鮮炒飯(新店限定,$148)
西班牙海鮮炒飯(新店限定,$148)

呢碟西班牙海鮮炒飯同樣香氣馥郁,當中有海鮮、蕃茄,同番紅花嘅味道。海鮮種類豐富嘅同時,每粒飯都吸收咗海鮮湯嘅精華,鮮甜得嚟唔會太鹹。就返香港人喜好,用咗珍珠米代替西班牙短米,口感較軟。

朱古力脆片蛋糕($38)
朱古力脆片蛋糕($38)

最後當然要食返個甜品,朱古力脆片蛋糕加上趣致畫盤,啱晒相機食先之餘,蛋糕食落朱古力香味亦相當濃郁,甜而不膩。

(左)吹啤啤 有彩蛋海鹽朱古力($68),(右)黑鳶 OH, BACON !($68)
(左)吹啤啤 有彩蛋海鹽朱古力($68),(右)黑鳶 OH, BACON !($68)

新店繼續供應多款本地手工啤酒,可以按自己喜好或者點嘅菜式去揀,今次介紹兩款相對Full Body嘅啤酒。黑鳶嘅OH, BACON !係Rauchbier-smoked Ale,口感濃厚,有煙燻香味,適合配搭烤或香煎嘅肉類主菜。

而吹啤啤嘅有彩蛋海鹽朱古力就係加入沖繩海鹽同可可豆釀製嘅Porter,甜中帶鹹、香濃豐厚,同比較重口味嘅主菜例如鹹豬手好夾!


Homeland
Homeland
Homeland
Homeland
Homeland
Homeland



Homeland
地址:大角咀大角咀道55-65號牡丹大廈北座地下9-12號舖




文:Cathy
相、片:Calvin Kwok