思家大戰｜ 李思捷回巢做主持被狂數成焦點 網民： 直頭中晒心中所想

由李思捷主持及監製嘅無綫遊戲節目《思家大戰》喺噚晚（29日）首播，第一集就搵嚟林盛斌（Bob）及朱凱婷帶同其家人和朋友出戰比賽。想知網民們睇完有咩感受，快啲轆落去睇下啦！

遊戲無聊欠新意
TVB購入《Family Feud》節目版權，製作香港版《思家大戰》，而遊戲形式相當簡單，就係兩組嘉賓鬥快搶答排行榜答案，排行榜嘅答案由抽樣訪問100名市民得出，而答案喺排行榜越前分數就越高，得分較高嘅嘉賓隊伍就可以爭取獎金獎品。節目出街後，唔少網民都認為遊戲無聊兼欠缺新意，例如：「唔太吸引，好悶。除非有強cast, 否則下次冇興趣再睇。」、「遊戲好普通啫，仲以為有咩新意」、「好悶喎，中學常識問題比賽咁，外國hit?」、「睇到好X老尷, 扮有氣氛」、「頂唔住。。 好白痴。用咁多錢買版權，唔係佢觀眾群」及「遊戲好娘好悶...似8.90年代 GAME SHOW...遑邊位買敢（咁）X game返來」等等。

對李思捷冇興趣
李思捷幾年前被網民選為「十大最討厭藝人」第三位，離巢3年嘅佢被邀請回巢主持《思家大戰》。雖然大家好耐冇喺TVB節目及劇集到見到佢，不過網民們仍然對佢印象麻麻，紛紛留言話「我對李思捷真係無乜興趣」丶「冇乜興趣 見到李思捷已經唔想睇」丶「佢最好笑既係，佢以為自己好攪笑」丶「李思捷淨係識chok 搵農夫做主持應該好笑啲」丶「平時睇開TVB, 今晚見到李思捷會熄電視，平時對d藝人冇乜特別鍾唔鍾意，但呢個實在頂唔順」及「見到李思捷就唔開胃」等等。

適合一家大細一齊睇
噚晚節目所問嘅問題非常貼地，例如「即食麵配咩最好味」、及「光頭嘅好處」等等，成功留住觀眾嘅參與度，唔少網民都話可以同家人一齊諗，留言話：「今晚我哋全家有大有細一齊睇，個個都笑得好開心」丶「都OK， 一家大細參與一下」丶「我唔會先入為主～我哋一家大細都有睇～老公同仔都睇得開心～輕輕鬆鬆半個鐘」及「今晚一家人一路睇一路笑，覺得幾好睇。」等等，唔知大家又有冇同屋企人估答案呢？

李思捷被狂數成焦點
喺第一集嘅問題中，引起最大迴響嘅一定係「講出一個李思捷最乞人憎的地方」，首先Bob及朱凱婷嘅家人和朋友就非常客氣，講出一啲唔係好缺點嘅缺點。不過輪到Bob與朱凱婷時，二人就非常不客氣，朱凱婷淡定講出李思捷「衰鹹濕」，而Bob更狂數佢「寸、扮型、扮勁、成日黑人面及態度差」五宗罪，唔少網民睇完都覺得好過癮，紛紛留言話：「講李思捷呢個好好笑 咸濕」、「寸到應！」及「節目ok, 不過主持就... 李思捷個條的答案， 直頭中晒心中所想。」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！