悠閒早晨 3間英、澳、日Brunch推介

週末嘆個好食嘅早午餐係唔少人嚮往嘅生活指標,悠悠閒閒約埋三五知己邊食邊傾,更加係人生一大樂事。以下介紹3間特色餐廳畀你同朋友chill住過週末~但都要記住,防疫措施要做足,千其唔好鬆懈呀!

手工製雞尾酒配週末限定早午餐 Okra

手工製雞尾酒配週末限定早午餐 Okra
手工製雞尾酒配週末限定早午餐 Okra

呢間充滿現代感嘅人氣日式居酒屋,最近推出咗週末限定嘅早午餐,日西混合,同一般日本菜唔同,主菜有鮮味十足嘅北海道海膽丼飯,仲有大廚 Max Levy特製嘅西多土同七味粉鮮蝦雞尾杯等美食。而居酒屋又點可以少得酒嘅呢?所以餐廳配合早午餐設計咗幾款限定手工製雞尾酒,包括煙燻蕃茄燒酎配醃秋葵同黑芝麻燒酎,大膽嘅配搭令清酒比起傳統嘅Bloody Mary更出味同開胃,更有清酒侍酒師Izaskun Levy助陣,根據客人喜好介紹手工製小眾清酒,清酒迷不能錯過!

供應時間:逢星期六 12:00-15:00

海傍西式早午餐 Ink

海傍西式早午餐 Ink
海傍西式早午餐 Ink

仿照澳洲悉尼岸邊咖啡店設計嘅Ink,位於星光大道旁邊,最近同樣推出咗新嘅週末早午餐,包括自家製烤酸種麵包配牛油果蓉同煙三文魚班尼廸蛋等主菜,仲有提供用澳洲牛奶整嘅自家製新鮮雪糕同即製糕餅,紅桑子奶茶雪糕更有陣陣茶香!食住呢啲經典嘅西式早午餐,嘆埋杯手工茗茶或者咖啡,望住個海同啲雲,chill到以為自己快閃去咗外國~

供應時間:逢星期六、星期日 12:00-15:00

經典英式早午餐 Brunch Club & Supper

經典英式早午餐  Brunch Club & Supper  圖:餐廳Facebook
經典英式早午餐 Brunch Club & Supper 圖:餐廳Facebook

唔係淨得all day breakfast先有得全日食,喺呢間經常座無虛席嘅餐廳,brunch都有得全日食!班尼迪蛋同奄列更係唔少食客必點嘅菜式。佢哋嘅餐包揀咗用健康嘅麥包,同埋brunch 嘅份量控制得啱啱好,唔係嗰啲細細份只係用嚟打卡用嘅。就好似佢哋個Mixed Grill咁,有齊炒蛋、豬肉腸、雞肉、薯餅同茄汁豆,個餐包仲可以加錢轉牛角包添,面層鬆脆,內裡軟熟,可以一試!

供應時間:全日

文:Hailey
編:Kar