想當年：潮到唔敢睇 80後不堪回首嘅潮物

每人心中都有一段唔想面對嘅過去，而呢段過去通常就係少年少女15、16時嗰段歲月，點解？因為只要一睇番啲相，就會問「點解當年自己要咁著？點解呀！媽呀！天呀！我當諗緊咩嘢呀？」無錯，著名愛情界KOL「忘了愛」嘅名言「過去的就由它過去，畢竟曾經只是曾經」；其實大家曾經嘅老土，宜家睇番何嘗唔係趣事一單，以下介紹幾款曾經紅極一時嘅本地潮物，唔知大家屋企櫃底仲收埋幾多款呢？

Beans Boy毛巾

唔知咪「那年夏天特別熱」，所有年輕人都要一條Beans Boy毛巾掛頸，兩邊必須對稱，而毛巾最大功用當然唔係拎嚟抹汗，只係造型一部分，絕對係街頭潮人第一號打扮。

Super Lovers Tee

Super Lovers係日本街牌，形象係可愛熊貓，主題就係「愛」（係愛呀哈利！）當年一件心心Tee著到全街都係，真係名正言順「讓愛與和平佔領。。。。。」咳咳，唔方便再講。

Patrick Cox袋

呢個經典Monogram袋，少有來自加拿大嘅潮牌，來自設計師Patrick Cox，不過雖然係加拿大牌子，但其實係佢英國長大，設計Logo都係童軍Logo，當年亦一街都係（老翻都一街係。）

Sunbrella袋

一個雨遮Logo深入民心，賣點係高質防水布料加多七彩顏色，簡直係少女味出晒嚟，當年仲要賣到勁多老翻，可見有幾受歡迎；而且產品多樣，從背包、斜孭、銀包都有，總有一款啱你心水！