【意大利熱血球迷】對手「0」我快樂

【Now Sports】喜歡一隊波,自然想愛隊好,對手唔好,就是如此簡單;所以見到對手0,我快樂。意大利又贏一場,睇見隊波又一次有好表現自然興奮,尤其欣賞上半場壓逼到對手冇咩機會,瑞士1次射門,0中框,數字反映戰局。作為意大利球迷,大賽成日見隊波打守波,周不時分組賽出線危危乎,今屆真係好唔同,主動,掌握戰局,而球員愈踢愈有信心,勇敢地作個人突破同放長傳,係賞心悅目。

上次喺本欄多謝嘅教練文仙尼保持一貫冷靜,領先2:0嘅時候,鏡頭影住佢個樣仲好似愁眉心鎖,唔知仲以為意大利落後緊,就係咁至Man!唔知佢諗緊咩,唔通已經諗定兩連勝後,最後一場分組賽點留力;係就好,我想識多啲唔係太熟嘅後備球員。到恩姆比利埋齋,至見文仙尼有燦爛笑容。

唯一唔開心係睇見基亞連尼食詐糊,見佢入波後好激情,點住VAR話佢犯手球。希望佢之後入番波補數,再爆激情。

相關文章:
【意大利熱血球迷】文仙尼,grazie!
https://sports.now.com/home/news/details?id=33673043417
【意大利熱血球迷】忘記帥哥兵團
https://sports.now.com/revamp/euro2020/web/news_detail.jsp?id=33661851908

撰文:Malena(燕飛)
現在我老了,人家才說「你很好」。