愛回家｜「曹總」劉一飛與袁文傑飲咖啡近照曝光 網民：好掛住你啊

TVB處境劇《愛·回家之開心速遞》一星期播足7日，食飯時間打開電視都會見到佢哋，除咗令唔少劇中主角成功入屋之外，唔少配角都備受關注，當中包括曾經喺劇中飾演「曹總」嘅劉一飛，不過佢喺前年因健康問題而離開劇組，並離巢TVB。神隱超過一年嘅曹總，近日終於現身啦！

喺前日（5日），「潮偉」袁文傑喺社交網站上載與「曹總」劉一飛及「池富」王俊棠嘅合照，並寫上：「曹總，出嚟見吓人好喎」。相片中，三人相約到咖啡店飲咖啡，現年73歲嘅「曹總」戴上茶色眼鏡，身形及外貌冇咩太大變化，只係頭髮稀疏咗少少，望落依然相當精神。唔少網民睇完曹總嘅近照後，紛紛留言話好掛住佢，例如「曹總身體幾好嗎？好掛住你啲廣東話」、「我哋好掛住曹總」、「如果得閒客串兩集，大結局時再出嚟客串圓滿」、「希望有機會再見到曹總」、「曹總，大家都關心你，見你安好，大家都放心了」、「曹總BB，好掛住你啊」、「曹總愛回家等你回來」及「掛住曹總」等等。

劉一飛飾演嘅「曹總」喺第一輯嘅《愛‧回家》開始出現，當時網民已經大讚佢扮起土豪入型入格，搞笑得嚟又可愛。去到《愛·回家之開心速遞》時，身為曹氏集團主席嘅「曹總」戲份雖然唔多，但就非常搶鏡，一口唔鹹唔淡廣東話，完美演繹內地土豪，加上為人正直又有情有義，深得網民喜愛。至於感情方面，佢曾經鍾意過熊若水（呂慧儀飾），不過可惜未能打動「水水」心，而佢嘅IG仲淨係follow熊若水一個，真係夠晒連戲同專一呀！另外，佢仲投資電影公司，開拍《金剛門傳》等多套劇集，所以與「熊尚善」滕麗名及「潮偉」袁文傑有唔少對手戲。不過佢喺2022年1月喺IG出PO宣布離開劇組：「本人因健康問題，要暫別大家一陣子，多謝各位的關心祝福！我已經掘電影公司轉售了一位城中名人，希望佢同潮偉繼續合作愉快！」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！