【愛國爸爸正能量】被指跟貼余文樂 周柏豪星途六大巧合之處

因為一句「感激身為中國人」而成為焦點人物嘅周柏豪，最近同擺明撐政府嘅阿叻陳百祥一齊受訪，講咗好多對政治嘅睇法，又俾阿叻加持「我同你冇分別」，正呀！

而杜汶澤就出post「潤」周柏豪「我認識嘅周柏豪係叻仔嚟，好有志氣，未紅嗰陣已經好想做余文樂，跟得好貼，甚至想超越佢。今日佢終於做到咗」。

咦，聽完杜生咁講，周柏豪嘅星途，以至其他事業發展，又真係同余文樂幾鬼似喎！

Model變歌手

余文樂2000年入行，初時係做模特兒，影吓本地時裝雜誌造型照，之後先拍劇(青春＠Y2K）同做歌手。而遲阿樂2年入行嘅柏豪，起初被著名模特兒公司相中，亦都係由平面model做起，後來柏豪因為面部爆瘡而退居幕後，做咗幾年錄音室助理，2007年被賞識轉做歌手。睇返資料，2個人都係18歲入行！

歌手轉型拍戲

論歌喉兩位型男都唔係唱將級數，余文樂近年除咗幫《志明與春嬌》系列電影唱吓主題曲之外，都好少有新歌推出。或者深知拍戲更有發揮，阿樂好快就將事業重心放喺電影方面，《志》之後更加奠定一線地位，有傳片酬升到400萬。

周柏豪喺樂壇成績不俗，拎過叱咤男歌手金獎，近年加盟TVB嘅星夢娛樂做一哥，自然攞埋最受歡迎男歌手啦。柏豪加入TVB當然想入屋，公司亦十分識做，4套劇都係重頭戲（《多功能老婆》、《使徒行者II/III》及《再創世紀》），電影方面都有涉獵，不過比起阿樂梗係爭好遠！

搞fashion brand

藝人最值錢係名氣，搞生意好正常。余文樂向來愛潮著，柏豪就有時裝界女友／老婆幫手搞造型，阿樂喺2014年創立潮牌MADNESS，仲搵到唔少日本牌子crossover；柏豪都唔執輸，搞個人服裝品牌XPX，出品秉承柏豪熱愛嘅暗黑風格。

打波

余文樂同周柏豪有段時間成日同場打波，2個人都曾經打過香港青年代表隊，入行後余文樂以佢成日出沒嘅元朗橫洲街場命名自己球隊「橫州工業」，柏豪都係成員之一。後來有傳因為柏豪暗中同阿樂個妹有來往導致兩人反面，柏豪後來自組球隊Power Ginger，不過聲勢唔夠橫洲嚟。

仲有一樣柏豪一定比唔上，就係阿樂有篇講到似層層、話佢打過NBA湖人隊嘅潮文！

成家立室做老豆

型男都會成家立室嘅，阿樂太太2018年5月誕下大仔Cody，柏豪嫂Stephanie就喺舊年生咗囡囡Sonya；翻查資料阿樂同柏豪咁蹺都係喺海外搞婚禮，有冇咁似呀？

政治表態

柏豪今次受訪表明對政治睇法，態度同舊年佢喺IG出嘅post明顯有異。阿樂嘅社交帳號，喺去年支持反修例運動嘅NBA候斯頓火箭隊時任總經理Daryl Morey帖文留言，並出言辱罵，後來阿樂話係俾人冒充。而阿樂服裝品牌MADNESS出品嘅一件衛衣，後面印有「五一」手勢，被解作「五大訴求 缺一不可」意思，阿樂立即澄清，表明「香港回歸中國是事實」，並將貨品下架。