愛護動物 希臘禁止過重遊客騎驢仔

19+

 

以前有個老細,身型有返咁上下,但係佢話平時興趣係騎馬……聽完,我戥隻馬慘。隻馬都係一個禮拜俾佢騎一日,希臘啲驢仔就慘啲。喺度假勝地Santorini,佢地要孭住啲遊客喺樓梯上上落落,日日俾人騎,仲要燕瘦環肥乜都有。有動物保育人士有見及此,就希望當地政府修例保障驢仔權益。政府又真係聽取意見發出指引,如果乘客體重超過100公斤,或者重過驢仔體重5分1,就唔可以騎驢仔。而且,驢仔如果年老、有病,都唔可以要佢地工作。仲有,養驢者仲要提供食物同食水,連個水兜幾耐洗一次都有規定。此例一出,反應都算正面,有遊客都好識做,一次過包三隻驢上山,咁就唔駛做死一隻咁慘。動保人士就覺得今次係一大突破,但係最終極都係希望驢仔唔駛做 — 因為而家仲有好多人用佢地嚟運水泥同電器,總之有咩重嘢都交俾呢班「驢友」。希望連馬術學校會立例規定騎馬人體重啦~原post傳送門

其他內容