【懷念吳孟達】《他來自江湖》周星馳即場度有味對白 瘋狂改劇本創造喜劇經典

·3 分鐘文章

今晚起TVB重播1989年劇集《他來自江湖》,作為對病逝的吳孟達及李香琴嘅致敬。娛圈痛失兩名好戲之人固然傷感,但《他來自江湖》卻係TVB數一數二高質喜劇,達哥同星爺繼《蓋世豪俠》之後再次合作,更加落手落腳即場創作,效果非常好,亦令佢地因此闖入影圈。

吳孟達x周星馳一劇彈起 TVB深夜重播《他來自江湖》全劇30集劇情簡介
吳孟達x周星馳一劇彈起 TVB深夜重播《他來自江湖》全劇30集劇情簡介

由兒童節目主持出身嘅周星馳,80年代後期轉投戲劇組開始拍劇,喺 《鬥氣一族》嶄露頭角之後被力捧,《蓋世豪俠》更上位做男主角,憑住自創口頭禪「飲杯茶食個包」備受觀眾歡迎。同劇要一人分飾兩角嘅吳孟達,既要演大俠又要演陰陽人,通告相當密,拍到企喺廁所瞓著。《蓋》劇編導李力持聯同星爺達哥當時已經開始鑽研點樣令對白劇情更好笑。

後來《蓋世豪俠》監製劉家豪再斬四兩,接住拍攝嘅《他來自江湖》搵星爺再搭達哥主力搞笑,但係《他》主線由萬梓良、恬妞同毛舜筠孭起,李力持同劉家豪協定唔會改主角對白,因此令星爺達哥可以玩得更放。

【懷念吳孟達】《他來自江湖》周星馳自創有味對白 瘋狂改對白創造喜劇經典
【懷念吳孟達】《他來自江湖》周星馳自創有味對白 瘋狂改對白創造喜劇經典

毛舜筠憶述拍《他來自江湖》嘅時候,埋位前周星馳成日會交代陣間場戲會拎一樣物件俾毛姐,其中一場道具係零食「媽媽腸」,星爺安排毛姐開唔到包裝紙,然後要同佢講「你可唔可以幫我捋一捋塊皮?」,仲將呢條腸叫「賓夕凡尼亞州霹靂大肉腸」,相當踩界!毛姐心諗呢啲對白一有問題就要返電視台配音,好醒咁將對白互換!另一次係星爺遞上大腳板雪條,佢想毛姐講句「我咁大個女都未試過咁大支嘢架!」。李力持就話本來劇中周星馳演嘅金水有句口頭禪「笨橙」,但係太似粗口,結果要全部剪走!

【懷念吳孟達】《他來自江湖》周星馳自創有味對白 瘋狂改對白創造喜劇經典
【懷念吳孟達】《他來自江湖》周星馳自創有味對白 瘋狂改對白創造喜劇經典

星爺、達哥同李力持又試過睇完同劇萬梓良好激動咁勸張鳳妮生性做人嘅戲份之後,喺電視台收工出市區專車上諗到「惡搞」呢場戲,佢地仲要夾定第2日早啲返電視台偷偷拍,萬梓良知道只係薄責兩句冇追究!不過佢地合力將劇本唔少篇幅改頭換面,令到編劇相當不滿,甚至連編審阿頭都要向高層投訴,好在出嚟反應好收視高,先至不了了之。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!