【懷念吳孟達】《喜劇之王》演場務萬梓良被易角 達哥執二攤 田啟文出呢招淋熄萬子怒火

吳孟達病逝，令TVB重播佢同周星馳經典之作《他來自江湖》。《他》可以話係周星馳、吳孟達甚至編導李力持成名作，後來周星馳同李力持合作導演嘅《喜劇之王》，更加標榜搵埋《他》男主角萬梓良以及達哥，堪稱完美重現經典班底，但係電影入面見唔到萬梓良（萬子）戲份，點解嘅？為多套周星馳電影擔任製作人嘅田啟文（田雞），喺訪問提到背後來龍去脈。

田雞話本來《喜劇之王》場務一角係由萬子演出，本來仲拍咗唔少場戲。有一日劇組改咗通告，由早班變成下晝先開工，田雞吩咐製片通知萬子改開工時間，但係當時溝通出錯，令到萬子早咗去到片場摸門釘！工作態度認真嘅萬子當堂著晒，田雞收到電話即刻飛返片場解畫……

向萬梓良跪低

田雞記得當時萬子、星爺同李力持喺晒房入面，佢根本諗唔到呢單嘢點拆，殊不知行入房嗰陣「kick」親，當場跪咗喺度！本來氣上心頭嘅萬子O晒咀，田雞打蛇隨棍上話「咁我做錯咗嘢吖嘛，而且你係我師兄，跪你都好啱嘅」。其實萬子哥好疼錫後輩，當星爺細佬同徒弟一樣，田雞「下跪」認錯梗係心軟，而且有埋下台階，危機就咁化解。而田雞叫萬子做師兄並唔係吹水拉關係，多年前萬子同田雞喺麗的電視拍過劇集《太極張三丰》，佢地真係飾演師兄弟！

呢件事只係易角前奏。《喜劇之王》當年要趕賀歲檔，時間緊迫不過進度未如理想，而周星馳又有好多即興改動。本來萬子哥嘅戲份效果好好，但係佢原定拍完套戲就去外國出席後輩婚禮，個期就完套戲都未拍晒，亦唔可能等佢返香港再拍。而「下跪」事件之後，田雞話萬子「要攞返個彩」，自稱狀態唔好，夜晚先到片場，點知一身酒氣。眼見咁嘅情況，一係cut戲，一係易角，星爺反對前者，咁唯有忍痛cut走所有萬子戲份再拍過。最終由星爺親口同萬子交代，據田雞形容兩個人傾完笑晒口，萬子仲叫劇組要撐星爺。即使套戲未拍晒，萬子係收足片酬嘅。

達哥帶病上陣 4日收工

飛起萬子之後，劇組立即搵星爺多年拍檔吳孟達頂上，不過當時達哥喺內地拍劇，田雞要大費唇舌向對方製作組「要人」，而達哥更加係抱病上陣，一落飛機就去片場埋位！達哥喺內地受訪提到，佢拍《喜劇之王》只係用咗4日時間，角色之所以光頭，因為係當時佢拍緊嗰套內地劇嘅造型。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！