我曾經月入$30,000 依家月入$12,000更富有

salary2609

文:Purple弟弟

大學畢業後,筆者有幸搵到份人工唔錯嘅工作,第二年已經搵大約$30,000!係唔少親戚朋友眼中嘅「叻仔」,但我十分討厭呢種心態,點解你自己個仔搵得少過我就等於唔「叻仔」呢?同埋點解要叫佢「學下我」,做自己有咩問題。

不要去羨慕 不要去妒忌

出嚟做嘢之後,最開心嘅就係放假約埋以前讀書啲朋友把酒當歌,講下以前讀書時期嘅趣事,但甚少會分享現時嘅生活,原因你知我知,因為現時嘅生活根本冇嘢值得分享!就算朋友知道我月入唔低,投以羨慕目光,但我內心反而羨慕我啲朋友,時不時又去下旅行陪下男/女朋友,總之就成日有活動咁,日子過得好充實,而自己好似只剩下返工同收工。

不過呢段心底話點可以隨便講出口,一方面實俾人話晒命,另一方面個社會價值觀都覺得搵得多就係成功,實俾人話「搵咁多都唔滿意,我哋呢啲收入低嘅又點計!」不過實情就係,講收入咪我贏,論開心自己可能包尾。

延伸閱讀:

呢個係咩思想 細時唔讀書 大個做運輸

日日用溝通為王 WhatsApp 40 個常見用語

搵得多真係等於開心?

的而且確唔知由幾時開始,搵得多等於開心嘅死板思想已經根深柢固,可能由父母叫你讀好書,將來搵返份好工果刻開始,呢種思想已經潛移默化咗係我哋腦海!

無可否認,咁後生月入$30,000的確為我帶嚟唔少優越感,但僅此而已!最後我辭咗原本嘅工作,相信唔少人同我父母諗法一樣,覺得我黐咗線!套用一句網絡文化常出現嘅句子回應,請體諒我嘅任性,錯嘅唔係我,錯嘅係世界!

最後我係屋企附近搵咗份自己感興趣嘅工作!人工只有$12,000,但我感覺到我嘅人生比以前「更富有」,有工作同工作以外嘅目標同寄託,終於似返個人,係生活緊而唔係生存緊!唯一可惜嘅係,轉工之後已經無咩親戚朋友讚過我「叻仔」!

延伸閱讀:

份人工真係唔夠使 後生仔3個儲錢貼士