戲院重開《狂舞派3》上映 網民睇完大讚有創意又感動

戲院受防疫措施影響而停業多時，去到噚日年初七終於重開啦！多套電影首批搶閘上映，當中包括由顏卓靈、蔡瀚億（Babyjohn）、楊樂文（Lokman）、劉敬雯及霍嘉豪等人主演嘅港產片《狂舞派3》。電影今次全用廣東話字幕及講本地rap文化，唔少網民睇完後都有不俗嘅評價。

《狂舞派》喺2013年上映時大受歡迎，今次續集《狂舞派3》延續狂舞精神，劇情主要講述龍城工廈區因為租金便宜，所以20年嚟吸引不同範疇嘅創作人進駐，當中包括嘻哈獨立唱作人Heyo、排舞師奶茶、人氣YouTuber阿良、新晉藝人Hana及佢嘅地下男友舞者Dave。不過近年工廈不停加租及嚴厲巡查，原來係地產商想將龍城轉型。其後佢哋收到工作邀請，阿良希望透過呢個機會令更加多人認識同欣賞佢哋呢班創作人。

唔少網民睇完電影後，紛紛喺討論區留言支持呢套電影，例如「睇左，好睇過一好多」、「都幾好睇 都好感動 係想講既野好多 但係 我諗係香港人既話 一定感受到入面講既野」、「睇咗 值得睇」、「拍攝手法幾有創意啊 我覺得唔錯」、「呢套你可以當劇情片 好值得細味」及「今午即刻去支持！正！好睇！好感動！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！