戶戶送撤港｜業界料 keeta 獨大 餐廳憂被「焗住砌」無力還價 恐平台削消費者優惠｜Yahoo

【Yahoo 新聞報道】外賣平台戶戶送Deliveroo下月 7 日撤出香港，有餐廳接受《Yahoo新聞》訪問時表示「擔心熊貓（Foodpanda）做唔做得掂」，甚至出現「keeta獨大」，屆時餐廳或被「局住嚟砌」，失去議價能力，無法討價還價。另一邊廂，面對戶戶送撤出香港，外賣平台在競爭力減少情況下，預計無需再燒錢推優惠，消費者得益亦因而減少。

keeta低佣金搶餐廳：對平台生態出現好大影響

家庭式經營餐廳（上海）榮華川菜館於 2016 年開始使用外賣平台服務，現時亦使用戶戶送、Foodpanda及keeta三間外賣平台服務。老闆Victor接受《Yahoo新聞》訪問表示，以往餐廳戶戶送的訂單多為團體、公司訂單，金額較大，Foodpanda則個體戶佔多，但keeta攻港即「以本傷人」，提供不同優惠，「兩個平台都食晒，食咗好多單」。他又透露，兩外賣平台向其餐廳收取 30 %佣金，但keeta初期只收取一成多，對餐廳而言十分吸引，「keeta出現某程度令香港外送平台生態出現好大影響。」

Victor預計，戶戶送撤出香港後，本港外送平台將出現「keeta獨大」情況。他引述市場調研機構Measurable AI數據指，keeta攻港半年，在 2023 年 12 月的市佔率已升至 37 %，Foodpanda則有 42 %，戶戶送的市佔率則跌至 20 %，相信keeta目前的市佔率或已高踞龍頭。他又指keeta為中資企業，最有資本做宣傳攻勢，「睇住熊貓（Foodpanda）、袋鼠（戶戶送）嚟打」。

憂長遠失議價能力：好多費用佢哋說了算

他認為，戶戶送撤港現階段對餐廳影響不算很大，但長此下去「擔心熊貓做唔做得掂」。若keeta日後一間獨大，餐廳可能被「焗住嚟砌，Commission（佣金）、好多費用方面佢哋說了算，我哋無任何bargaining power（議價能力）討價還價。」加上疫情已過及經濟轉差等因素，餐廳外送平台單逐漸萎縮，由疫情期間佔整體生意三至四成，現時僅佔約一成半，「跌咗好多」，加上面對經營成本壓力，將來若外賣平台收費越來越高，「覺得唔抵做」，將逐漸減少使用外賣平台，專注自家外賣服務。

Victor續指，不少內地商家對香港市場虎視眈眈，不排除京東、阿里巴巴集團旗下「餓了麼」、拼多多亦在港提供外賣平台服務，推優惠佔據市場。

餐廳對戶戶送有感情 職員妥善跟進

另一家庭式經營餐廳民聲冰室早於戶戶送在香港插旗時，已開始合作至今。老闆倫哥接受《Yahoo新聞》時坦言，對戶戶送有感情，雙方一直合作愉快，當遇問題時餐廳可直接聯絡職員跟進，「咁樣係會親密啲，就會好啲」，對公司撤出香港表示可惜。他指，現時外賣平台每日的生意額佔餐廳生意一成多，預期戶戶送撤出初期有些微影響，但認為客人一般多已下載Foodpanda，相信客人亦會轉用Foodpanda叫外送。

倫哥說，餐廳兩、三年前始與Foodpanda合作，但客源與戶戶送的不同。當Foodpanda提供着數優惠才會帶動訂單量，「Deliveroo就好穩定，交收又穩定，數目又清楚......系統亦簡單易用。」他希望Foodpanda可延續戶戶送的經營理念，做足跟進工作，處理得更好，「Deliveroo跟開我嘅同事又喺返嗰度（Foodpanda），如果有咁消息帶到畀我，咁我就安心啲。」

倫哥亦提到keeta進軍香港初期曾不斷派員游說合作，「係咁用啲攻勢，又落嚟幫襯食飯，開頭有啲口音唔係咁正，佢又醒目會搵返啲口音正少少，純正香港人嚟繼續sell，但而家我都未join。」他認為，大公司經常以優惠吸引消費者，「啲客都唔係想食你，根本因為優惠」，故會再視乎情況才決定是否與keeta合作。

「消費者會冇咁得益」

香港資訊科技商會榮譽會長方保僑接受訪問時指，疫情時期亦多用外賣平台，但現時已甚少使用，「（戶戶送）始終唔係平，又有 minimum（最低消費），我叫個飯盒，落街食算啦。」他認為戶戶送撤出香港原因，除了面對 keeta 大舉進軍攻勢，疫情後外賣熱潮冷卻，下午在公司未必叫外賣，晚上亦減少在家用膳，加上港人北上消費，外賣平台用戶減少，實難以支持三間類似的外賣服務。

方保僑續說，香港難免出現寡頭壟斷情況，稱 Uber Eats 數年前亦撤出香港，「睇個樣擺唔到 3 個，兩個就無事，第 3 個一入嚟行咗一陣就有一個走」。他相信，外賣平台競爭減少後，已無需再燒錢，加上大公司不會做蝕本生意，「消費者會冇咁得益，（因為）減咗啲優惠。」