才藝表演靠父幹 被批不公 關楓馨尷尬:會吸取教訓

關楓馨聲稱出動爸爸表演前,曾與其他佳麗商量。
關楓馨聲稱出動爸爸表演前,曾與其他佳麗商量。

港姐準決賽前晚告一段落,獲爸爸關禮傑幫拖表演的關楓馨,被指「搶Fo」兼對其他佳麗不公,她昨日解釋純粹想帶驚喜給觀眾,連聲否認「靠父蔭」,會吸取今次教訓。

《2021香港小姐競選》12強正式面世,一眾佳麗昨日見傳媒,衣飾比準決賽當晚更吸睛,惟梁菁琳因身體不適缺席。前晚關楓馨在才藝表演中與爸爸關禮傑「四手聯彈」,事後被網民批評對其他佳麗不公平,她昨日尷尬解釋:「爸爸唔係幫手,琴都係我自己彈嘅,之前有同其他佳麗討論過,決定畀少少驚喜觀眾啫!」又否認搵爸爸出手拉票:「我諗每個人嘅睇法都唔一樣,當然會有人鍾意,有人唔喜歡,我哋會吸取教訓,下次未必會咁。」賽後她與佳麗攬住喊,觀眾席上的關禮傑亦感動到眼濕濕。

至於憑口才100%KO對手的宋宛穎,偕陳聖瑜齊齊受訪,她謙稱:「之前真係冇諗過會咁,只知要喺最短時間內諗到一個大方得體嘅答案,好彩出嚟效果唔錯。」對於關楓馨父女檔上陣成話題,問會否效法對方,找曾奪澳門小姐亞軍的媽咪撐場,她笑說:「佢喺電視機前支持我,佢唔鍾意出鏡,希望總決賽可以現身支持吓啦!」

同樣未感遭不公平對待的陳聖瑜,一直是今屆大熱,她自覺在台上有少少緊張:「好彩最後都大步檻過。(好友梁允瑜對首輪被淘汰感不忿?)佢嘅表現好淡定同有自信,可能未去到答問環節就要走,令佢冇得發揮。(受負面新聞影響?)可能真係有,但佢知錯能改,應該畀機會佢。」

收視高收19.9點

對於安排關禮傑上台一事,港姐大會統籌經理何小慧說:「紅組表演係故事設計形式,女生夢見爸爸同自己一齊彈琴。(網民戥其他佳麗不值?)都係想大家(指記者)有啲嘢寫啫!」談及曾拍「粗口片」的梁允瑜認為賽制不適合她,何小慧說:「知佢唔開心,有喺後台同佢傾番。(落選嘅會安排試鏡?)知道佢哋好多都想入行,之前都安排咗啲鍾意唱歌嘅同星夢高層何麗全見面。」至於缺席的梁菁琳,何小慧指她嚴重食物敏感,平日已很小心,參加訓練時更會自備食物:「尋日拜神時大煙都有影響,佢今日有返嚟,不過見暈又想嘔,我話不如休息吓,身體好啲先參與其他工作。」

而準決賽收視不俗,平均有18.6點,最高19.9點,較過往4周的同時段節目躍升5.1點。

關楓馨入圍後攬住佳麗喊,台下的爸爸關禮傑亦眼濕濕。
關楓馨入圍後攬住佳麗喊,台下的爸爸關禮傑亦眼濕濕。
關禮傑
關禮傑
宋宛穎希望曾奪澳門小姐亞軍的媽咪,現身總決賽為她打氣。
宋宛穎希望曾奪澳門小姐亞軍的媽咪,現身總決賽為她打氣。
陳聖瑜為出局好友梁允瑜講好說話,力撐她知錯能改。
陳聖瑜為出局好友梁允瑜講好說話,力撐她知錯能改。